鬼佬、嘎仔、竹升仔点解会有呢啲花名？唔通广东人有种族歧视？

鬼佬或者番鬼佬即系高加索人，系广东话嘅俗语，响普通话俗语就叫“洋鬼子”。跟字面解即系“鬼佬”，由于广东人观念认为高加索人大多数都系红须绿眼，又或者源自19世纪因外国军队入侵中国，而产生“鬼佬”呢个词。连英文都有gweilo呢个字。

类似嘅，高加索女人叫鬼婆，细路仔叫鬼仔，小女孩就叫鬼妹。衍生出嚟，有人叫黑人做黑鬼。有啲高加索人认为“鬼佬”呢个称呼系对佢哋嘅侮辱。响1980年代，有啲广东人响“鬼佬”呢个词前面加个“死”字，即系咒人哋去死，令呢个称呼变得有侮辱性。

有好多粤语人口响公众地方都一样叫啲白种人或者西方人做“鬼佬”，佢哋认为呢个称呼冇贬义或者争议。“鬼佬”呢个称呼有出现响香港嘅儿歌，当时都冇人认为有问题。

有啲白种人觉得鬼佬呢个称呼系对佢哋嘅侮辱。重有根据香港法例，喺一个工作地方、学校、公共机构等，任何人如基于另一人嘅种族…作出唔受欢迎嘅行径（可包括口头或者书面陈述）…作出嗰个行径嘅人即属对第个人作出骚扰。即系话如果对方唔欢迎或者唔钟意呢个称呼，叫佢“鬼佬”有可能会犯法。另一方面，而家有啲住响香港嘅西方人偶然会笑笑吓自称“鬼佬”，呢点反映出思想开始变化，由当呢个词系污蔑至入乡随俗。

嘎仔，呢个对日本人嘅称呼，系出现响日军侵华时期嘅，因为日本人好钟意用“巴嘎”或“巴嘎呀Lu”嚟闹人蠢材，所以，粤语地区大多数老一辈嘅人就会嗌啲日本人做“嘎仔”。

竹升系广州话俗语，原本即系“竹杠”咁解，因为“杠”读音好似“降”一样，唔好彩头所以要避忌。

竹升亦都系指喺西方国家出世啲华人，因为竹竿系空心嘅，比喻佢哋个心冇中华文化嘅思维。男仔叫竹升仔，女仔叫竹升妹。另外一种叫法系香蕉人，因为佢哋外面系黄色嘅，但系入便就系白色嘅。

佢哋自细就受西方文化影响，唔多识中华文化，未必识讲或写中文。讽刺嘅系，外国青年会认为佢哋唔系自己人，好少会同佢哋做朋友，但同喺大中华地区出世后先至移民当地嘅华人思维方式又唔同，一样唔易同佢哋做朋友。呢种两头都唔通嘅情况，亦系“竹升”嘅解释，因为竹有节，喺节嘅中间，就两头都唔通。

捞松一词系源于讲国语人士嘅一句口头禅老兄，因为佢哋好钟意叫人“老兄”，而近代讲粤语嘅人士开头想用同样称呼表示对佢哋嘅尊重，但系又难以模仿佢哋嘅国语口音，于是就将讲国语人士称呼为“捞松”，后来以讹传讹变成咗歧视啲讲国语人士嘅统一称呼。

另外重产生咗“捞B”、“捞佬”、“捞头”甚至“捞閪”呢啲配搭粗口用，带贬义嘅同义词。

资料来源维基百科，由羊城网综合整理。