“饮早茶”系广东人一个非常重要嘅标签，仅次于“广东人中意食福建人”。（开个玩笑~）

其实比起“饮早茶”，我更加中意粤语之中嘅“叹茶”一词。

广东人饮早茶，唔单单系叹一壶茶咁简单，我哋叹嘅更加系一种悠然自得、生活至上嘅人生态度。

广东人饮早茶嘅风气兴起于清代，一直延续到依家。

问大家一个问题，你哋估唔估到，你阿爷嘅阿爷嗰代，都系喺啲咩地方饮茶？

咁就要从百几年前，佛山街边一种“走鬼档”茶馆开始讲起……

清朝咸丰年间，喺佛山出现咗一种叫“一厘馆”嘅食肆，多喺街边巷口开档，呢啲就系最早最原始嘅广东茶楼。

所谓嘅“一厘馆”，得名于佢嘅茶资仅收一厘（你可以理解为一蚊一个茶位）。

而“一厘馆”架构非常粗简，竹棚遮头，木枱板凳，供应粗作嘅点心，开口挂住个木牌，写住“茶话”两个字。

▲我稍微发挥咗下想象力，估计“一厘馆”就系TVB古装剧常见嘅茶棚，加个竹棚盖顶。

“二厘馆”同“一厘馆”一样，都系低矮简陋嘅茶肆，同样供应点心，不过茶资就变为二厘，点心种类比“一厘馆”多啲，比如芋头糕、松糕、钵仔糕、油炸鬼之类。

故有民谣曰：“去二厘馆饮餐茶，茶银二厘唔多花。糕饼样样都抵食，最能顶肚唔花假。”

“二厘馆”嘅升级版就系“茶居”，“茶居”嘅“居”字，多少系为咗适应文人雅士嘅情趣。

“茶居”面积唔会好大，只可容纳数十位食客，面向群体都系附近嘅街坊。

“一盅两件”就起源于呢段时期。

最初嘅“一盅”，指嘅系石湾产嘅大耳粗嘴绿釉鹌鹑壶，配瓦茶盅，壶中放最便嘅茶叶，茶味苦涩而冇香气，仅用于冲洗肠胃。

最初嘅“两件”，通常系指松糕、芋头糕、芽菜粉、大包呢啲制作粗糙、价廉物美嘅茶点（茶居可供选择嘅种类唔会好多），以摆台嘅形式，由客人自选取食，唔使点叫，食完找数即刻。

茶客多数做“三行”同苦力嘅劳苦大众，佢哋做完一日嘢，就会去茶居寻求片刻喘息，会会工友，吹下水，了解下市道行情。

随著饮茶文化嘅普及，客人饮茶食点心之余，希望有地方可以长时间坐低倾计，并且保护佢哋嘅隐私。

由此喺“茶居”嘅基础上扩大规模，就诞生咗堂皇体面“茶楼”。

广州第一间茶楼，系清同治年间开设嘅“上茶居”。直到清光绪年间，“上茶居”更名为“上茶楼”，随后好多“茶居”也纷纷改居为楼。

茶楼嘅楼上中间设厅堂雅座，周边设安静套间，地下门市用嚟卖茶点糕饼。

有啲老式茶楼仲会分等级，楼上比楼下贵，因为楼上有空调（或风扇），而且地方更加开阔。

由于茶楼的设备、环境和服务都上了档次，茶楼嘅茶资要三分六厘（1分=10厘），同“二厘馆”足足差咗36倍，更莫讲啲贵价点心。

好多小市民都望尘莫及，唯有去返“二厘馆”或者“茶居”。

所以当时就流行“有钱楼上楼，无钱地下蹴”嘅说法。

仲有件事大家知唔知，茶居、茶楼早期仲有个神奇嘅功能，就系“人才招聘市场”。

饮茶表面上就系饮壶茶，食餐饭，实际上饮茶早就已经成为广东嘅社交文化。

阿基米德讲过，给我一个支点，我可以撬起成个地球。

我哋广东人就话，畀我一壶靓茶，我就可以讲尽天文地理，畀多几件点心，我就可以倾到天荒地老。

各位自己友，

你哋最中意嘅茶楼又系边间？

素材出自互动百科、粤菜溯源录等

羊城网负责整理编辑