好多人都以为七月十四鬼节先系重头戏，但传统观念强小小嘅广府人（我阿妈）认为，鬼节应该叫做“鬼月”！

踏入农历七月，鬼门开始慢慢打开！历时十四日，鬼节当日鬼门全开，过后直至七月廿九，鬼门再慢慢关闭…（鬼门从开启到关闭，整好一个月，所以叫鬼月）。

二十一世纪，咩都要讲科学。但每逢农历七月，亲爱嘅妈咪都会提醒我哋：早啲返屋企啦！（并非所有广府人都会这样…）除咗“早啲返屋企”之外，七月仲有啲乜嘢禁忌？

七月外出出游又好、拜祭先人又好、喺高速路塞车都好，如果冇厕所，人有三急千祈咪乱嚟！若然真系忍唔住，搵个角落，“开火”之前讲三声“唔该借过，唔该借过，唔该借过”！

鬼都系讲道理嘅，你对佢有礼貌，佢都会礼貌对你！招呼都唔打声，直接开火，咪话鬼，佛都有火啦！

据说鬼钟意靠墙休息（因为墙冰冷凉爽），沿住墙边行，或者挨住墙，可能会打扰到佢哋休息。都系嗰句：你对佢有礼貌，佢都会礼貌对你！

人身上有三把火（有人说是“三盏灯”），左右膊头、头顶各一把。七月里面，唔好乱搭人膊头，都尽量唔好畀人搭膊头。万一搭熄咗把“火”，就容易成为游魂野鬼嘅目标！

农历七月，好多人会喺路边拜祭。结束之后，会将“祭品”留喺原地，供鬼享用。

呢个时候，无论见到地下有咩值钱嘢，就算系钱都好，都唔可以执！用嚟拜祭嘅食品更加唔可以食！同鬼争嘢食，嫌命长！

不过，若然有张一百蚊喺地下……路人跌嘅啫，冇事嘅！

如果朝早洗衫，朝早晾，最好天黑前收衫。习惯夜晚洗衫嘅自己友，最好就第二日再晾衫，鬼钟意阴凉，小心畀鬼“借衫着”！

农历七月，夜晚出街，无论自己一个人，定系同朋友出去，如果隐隐约约听到背后有人叫你个名，都唔好回头，因为有可能系只鬼呼唤紧你！

就算听到你暗恋嘅男仔/女仔把声，都唔好回头，话知佢嬲又好，要绝交又好，大不了咪打个电话say sorry…

就好似阿妈由细到大都同你讲：唔好咁夜返！鬼门开，加上夜晚阴气上升，对于游魂野鬼嚟讲，反而鬼气变旺，阳气不足嘅自己友最好都系趁早返屋企啦！

所以呢个月，大家尽量唔好夜蒲、唔好加班啦…

点讲都好，呢啲都系冇科学根据嘅讲法，只系上一辈流传落嚟嘅文化，信则有，不信则无。不过，阿妈叫你早啲返屋企，你咪听下佢话咯，有蚀底咩？