我：“呢个女配明明咁装逼，点解个男主角噉都睇唔出㗎？！”

妈子：“装咩逼啊？你讲咩嘢啊？”

我：……

我：“哇！隔离阿花帮我抢到老麦优惠券啊！双击666！”

妈子：“咩啊？你噏乜嘢啊究竟？”

我：……

我：“啊啊啊好靓仔啊！！为男二疯狂打电话啊！！”

妈子：“你有人哋电话咩？懒叻！”

我：……

【电灯杉挂老鼠箱】旧时香港嘅灯柱会挂上一个老鼠箱，方便市民将发现嘅死老鼠放入箱里面，抑制病菌蔓延。初期嘅灯柱用木衫制造，所以称之为“电灯杉”。因为电灯杉极高，而老鼠箱相对矮细，两样嘢挂埋一齐形成强烈对比。通常用嚟形容情侣身高悬殊。

【水皮】苴皮，喺古人鞋里面嘅垫草；苴服，即系粗服。“苴”就被用嚟引申为糟粕、渣滓、贱物嘅意思。特别系苴皮，系差品之中嘅差品。粤音将苴皮读成“水皮”，所以“水皮”就有下等、次等嘅意思。

【蒸生瓜】未蒸熟嘅瓜咬落去唔软唔硬，广府人称之为“肾”。“肾”、“侲”系粤语里面同音，“侲子”有如神灵上身，表现出半疯半颠嘅神态。但系通常用嚟形容女子。

【少块膶】广府人钟情嘅及第粥里面嘅材料包括咗猪腰同猪肝，猪腰又叫猪肾，猪肝又叫猪膶。有时候粥店生意太好，猪膶好快卖晒，或者食客唔中意猪膶嘅苦味，要求唔落猪膶，店家就会增加猪腰嘅分量嚟替代猪膶，即系“少块膶，多咗肾（侲）”。

【乱噏廿四】“噏”指众人嘅声音，词语中表示说话。“廿四”指廿四史，中国古代历朝撰写嘅二十时部史书总称。廿四史被视作正统，唔可以乱噉讲——乱噏廿四。

【跴亲条尾】“跴亲条尾”出自《易经·履卦》，原意系人应该小心循礼而行，就好似跴喺虎尾上面而唔畀老虎咬到，先可以亨通。试想一下，如果你去跴老虎条尾，老虎梗系唔妥你啦！“跴亲条尾”就用嚟形容得罪人啦。

【二打六】一种说法系话“二打六”即系“二搭六”，“搭”指加上，“二打六”就等于二加上六等于八，未够十足十，引申为可有可无。另一种讲法系来自戏班，二打六加埋得八两，喺戏班里面，唔够斤两嘅人只可以演无关重要嘅角色。

【三分颜色上大红】以前嘅颜料色种系用自然物料嚟调制嘅，比如话调红色颜料，就要用朱砂，朱砂放得越多，颜色就越红。如果只用三成朱砂嚟调制，梗系冇可能调出大红色啦。

【豆泥】广府人做饼嘅馅料通常有莲蓉、豆沙同豆泥。豆沙系指用红豆去皮存沙做成嘅馅，豆泥则系用黄豆做成嘅馅。呢三种馅料中，莲蓉卖得最贵，豆沙次之，最平系豆泥。所以一啲唔上得台面嘅嘢就会被叫成“豆泥”。