曾经听过一个笑话：有一日，男人去夜总会应酬客户，搞到成身香水味，怕返到屋企老婆闻到会误会佢有外遇，于是佢去咗屋企楼下一间火锅店食咗个宵夜，成身“火锅味”返到屋企，点知老婆大怒：“你个冇良心嘅臭男人！去打边炉竟然唔叫埋我！”

虽然只系一个笑话，但都体现出广东人对“打边炉”确实情有独钟！岭南地区天气炎热，但秋冬嘅湿冷实在令人难以忍耐，而打边炉正正可以帮你由内而外咁彻底驱寒！

你肯定有过咁嘅经历：12月嘅广州，冬天姗姗来迟。漫步街头，路人行色匆匆，饥饿同寒风相互交逼。但系饭店里面却洋溢出兴奋同热烈，温暖嘅灯光、蒸腾嘅水雾，透过门窗散发出亲切嘅召唤，试问边个可以抗拒咁样嘅诱惑？

于是，迫不及待咁闪入一间热闹沸腾嘅饭店，都未等咨客小姐招待，就抢先讲出令人幸福感爆发嘅嗰三个字：打边炉！

何谓“边炉”？“围炉而食，人在炉边”，但系好多人唔知道“边炉”嘅正字其实应该写为“甂炉”。

“甂”为古字，音同“边”。《说文解字》曰：“甂，似小瓿，大口而卑，用食”；《汉语大字典》释为“小瓦盆”。

PS：打边炉取“围炉而食，人在炉边”之意，更能体现广东人对打边炉嘅喜爱，因此，本文编辑写为“打边炉”。

岭南嘅“打边炉”，喺北方称之为“涮火锅”。传统嘅“边炉”有一种炉、锅一体嘅款式，多数用铜做原料，下部为炉，上部为圆筒形烟囱同围着烟囱嘅“边锅”。

使用时，下部炉灶烧炭，上面边锅装汤、食物。烟囱起排风助燃嘅作用；呢种甂炉依家已经好少见。家家户户都有液化气炉、电磁炉，既干净又卫生，简便实用。（相比之下，甂炉嘅缺点就显得非常突出，而且烧炭会产生烟尘同刺激性气味，对家居或者店铺空气环境都会造成污染！）

“火锅”早喺明清时期已经十分流行，明朝宋诩嘅《宋氏养生部》记载：“生爨羊”、“熟爨牛”等等都系火锅菜式。到咗清代，火锅唔止民间盛行，而且进入宫廷，成为深受皇室喜爱嘅宫廷菜式！

岭南地区嘅打边炉同北方嘅涮火锅其实操作上大同小异，都系用滚汤烫熟菜肴，区别在于汤底、食材同蘸料嘅差异。

岭南人打边炉，食材丰富、取料讲究。一般会用骨头汤、肉汤或鸡汤做汤底，（更讲究嘅，会用蛇肉龟肉等做高汤，配上北芪、党参、红枣、淮山、杞子等）。岭南打边炉嘅食材种类繁多，但始终围绕一个原则，新鲜！

打边炉必备食材清单

 

肉类：鲜鱿鱼、鲜虾仁、生鱼片、生蚝等河海鲜；猪、鸡、牛、羊等各种生肉片、潮州牛肉丸、鱼肉丸、猪肉丸等。

 

蔬菜：黄芽白、西洋菜、茼蒿、生菜、草菇、平菇、白灵菇、金针菇、芋头、粉葛、萝卜、冬瓜等。

 

其他食材：腐竹、腐皮、水豆腐、豆腐泡、红薯粉条、魔芋粉条、绿豆粉丝等。

对于蘸料，潮汕牛肉火锅偏爱西芹粒+沙茶酱；偏好清淡嘅人，简单姜葱蒜加豉油，同样可以为新鲜食材嘅质感提升上另一个档次！（蘸料并冇标准，完全睇个人口味同偏好。）

岭南地区天气炎热，所以打边炉通常都系秋冬之际，天气转寒凉之时。打甂炉虽然好食又过瘾，但系大家都应该注意几点：

1、烫熟食材之后，吹冻先食。好多人觉得打边炉“一热当三鲜”，但炉里面嘅汤可以高达100度以上，而人体口腔、食道粘膜可以承受最高温度只系50-60度。

2、尽量唔饮汤。打一次边炉，好多种食材都放入同一个炉里面，嘌呤含量亦都随之增加（容易引发痛风），所以并唔建议大家饮汤。如果要饮，尽量开始“打”之前饮。

3、控制食量。打边炉必备“肥牛”、“肥羊”等肉类，但肥牛比普通牛肉片嘅脂肪含量都更加高，所以为咗健康，真系要适量！

4、清淡为主。广东火锅汤底已经有一定调味，而且打边炉过程中，因为炉里面嘅亚硝酸盐都不断增加，所以好多人都会觉得越打越咸。

我唔相信呢个世界会有

童话咁嘅爱情故事。

但如果你请我去打边炉，

咁我哋嘅故事就开始了！