摘要：我先饮为敬！
世界上有两种人，一种人未饮过广东凉茶，另一种人饮完广东凉茶之后，就被广东凉茶深深深深深深（*n）伤害，从此见到凉茶铺都掉头走。
而我系后者。
广东潮湿燥热，体内容易上火聚火，所以广东凉茶系岭南人生活必不可少嘅一部分。最近天气多变，潮湿闷热，周围凉茶铺生意都好咗好多。
细个嘅时候，大家都会被阿爸阿妈呃过/逼过/灌过饮凉茶。我阿妈为咗要我饮碗廿四味，讲过最离谱嘅大话就系——
“凉茶就系凉凉哋噶，一啲都唔苦噶，饮完喉咙就唔痛嗰啦！”
大家可想而知，我饮咗啖凉茶之后——
鉴于大家相似嘅童年经历，下面就由广东凉茶米芝莲评选组织亚太区总部——羊城网编辑部评选出广东凉茶之最。
最具争议嘅凉茶
鱼腥草茶
鱼腥草，一样大自然嘅神奇之作，长期占据最具争议食物排行榜头三位，中意佢同唔中意嘅人自成两派。鱼腥草茶都系咁，怪中带点腥，腥中透啲怪，有人对其趋之若鹜，亦有人对其避之不及。
最不可描述嘅凉茶
癍痧
冇一个广东人可以搵到准确嘅词语形容出癍痧嘅味道，因为佢夹杂咗苦、涩、酸等多种令人恶心味道同口感，令你一饮就即刻想呕。
所以话，对于广东凉茶，苦只系最轻松嘅体验。
伪装得最好嘅凉茶
板蓝根
点解话板蓝根系伪装得最好嘅凉茶？
因为甜到咁，好饮都咁，点似我童年回忆中嘅凉茶啊！我一直当板蓝根系饮料咋！
最冇卵用嘅凉茶
夏桑菊
喉咙痛、感冒、热气等好多情况下，你都可以饮夏桑菊，但当你饮得多夏桑菊之后，你会发现，夏桑菊真系一啲卵用都冇，冇咩实际功效，感觉就系饮杯茶嚟压压惊！
对人类最友好嘅凉茶
火麻仁
喺一众令人叫苦连天嘅凉茶之中，火麻仁简直就系对人类最友好嘅凉茶。外表睇起身好似黑暗料理，其实好饮之余又效果显著，通便非常使得。
重新定义你人生嘅凉茶
你阿妈煲嘅凉茶
喺你阿妈眼中，咩草药都可以用嚟煲凉茶，你永远唔知你面前呢碗嘢，究竟系咩家伙？阿妈讲一句“饮咗有益啊”，就算再难顶都要饮晒佢！
一碗妈子凉茶，唔单止重新定义你人生，甚至可以重新定义你娘亲！（亲生阿妈绝对唔会咁对你啦！）
**以上盘点仅供娱乐，大家想饮凉茶，一定要结合自己嘅身体状况选择合适、正规、安全嘅凉茶！
讲咗咁多，好似一直抹黑紧广东凉茶，但每当我喉痛热气，头晕身庆，我第一反应谂到，依然系去凉茶铺饮杯苦到入心入肺嘅凉茶，然后食啲陈皮同嘉应子嚟解苦味！
其实系每个广东人心目中，广东凉茶唔单止系一碗草药煲出嚟嘅苦茶，而系一种深植于脑海中嘅文化情结。
呢碗琥珀色嘅苦茶，永远都令我哋引以为荣。
各位自己友，
你哋心目中凉茶之最系边款？
你饮过最难忘嘅凉茶又系咩？
图片素材来源于网络
本文看点由羊城网原创
最新评论