摘要：今日同老友行咗转北京路。同大部分广州仔一样，我好憎北京路，好多人、好逼、好吵！而我嚟，只不过系因为“路过”。闲计之中，同老友倾到“最广州”嘅美食。有人话“艇仔粥”，有人话“叉烧”，有人话“白切鸡”，都有人话“炒牛河”。虽然佢哋讲嘅，我全部都中意食，但系讲到“最”，我只有一个回答：牛杂。
2017年 1月14日 星期六 雨
今日同老友行咗转北京路。
同大部分广州仔一样，我好憎北京路，好多人、好逼、好吵！而我嚟，只不过系因为“路过”。
闲计之中，同老友倾到“最广州”嘅美食。有人话“艇仔粥”，有人话“叉烧”，有人话“白切鸡”，都有人话“炒牛河”。
虽然佢哋讲嘅，我全部都中意食，但系讲到“最”，我只有一个回答。
牛杂。
PS：上文为本人日记原文，有不少错字，望谅解。
吵—嘈 计—谒 中—钟
”
正好，近排都收到唔少自己友嘅意见。
讲起牛杂，佢嘅起源一直有好多争议，说法都好多，有人话系“祭祀农神”嘅习俗、有人话系“白牛仙女七星岩”嘅神话传说…
而起源地都一样众说纷纭，有山东、有湛江、仲有唔知边度嘅一条古村…
牛杂喺广州兴起，我认为呢个说法比较有说服力：
清末民初，广州回族人主要聚居喺东起大南路南胜里，西迄光塔路、惠福路一带，回族人经营嘅食肆经常同族外人嘅饭馆犬牙交错。
当时，四牌楼有一间利栈茶居。一个叫阿德嘅外省回民，初来广州，去到利栈食唔到牛肉。族外老板信关帝，因为关帝脸色通红唔食牛肉，佢就呃阿德，广州人都唔食牛肉！
后来阿德了解实情之后，为争口气，阿德留喺广州，喺利栈正对面开咗间店，取名“牛香”，首创卤水牛杂，前所未有，而且风味独特，所以客似云来。
曾经有外省朋友问我：“为什么你这么喜欢吃牛杂？”
我谂咗下，一时间真系答唔到呢个问题，只不过，我又真系好钟意食牛杂！正如上面嗰位自己友讲嘅“扫街必食”，但唔同嘅系，我唔钟意“扫街”。
扫街：比喻，指到处吃街边小食。
又回想起过往二十年，有时一年半载先食一次烧鹅；过节生日先食一次鸡；虽然经常饮茶，但都唔系次次想食虾饺干蒸糯米鸡。唯独是牛杂，唯一系我经常食，又经常想食，而且食极都唔厌！
小学、初中、高中，无论学校有几多个校门，校门口都梗会有一个“牛杂阿姨”或者“牛杂阿伯”。佢哋推住部“走鬼车”（或单车），每逢放学就会嚟到校门口摆档。
阿姨阿伯风雨不改，日日准时。而更加风雨不改嘅系，牛杂档肯定会堆满为食嘅学生哥！
好多老友都问我：”你咁了解广州，一定知道边度嘅牛杂好食啦！“
云吞面去宝华，肠粉就去银记，鱼皮就陈添记？
呢啲都系废话，我当然唔会同你讲呢啲啦！
但系好抱歉，我冇办法话畀你知，边度牛杂好食。唔似云吞面同肠粉，牛杂好唔好食，并冇一个多数人认可嘅标准。
有人钟意牛杂配搭混酱，有人钟意牛杂加上咸酸；（混酱：海鲜酱、辣椒酱、番茄酱、甜酱的相互配搭）
有人钟意牛筋入口即化，有人钟意牛筋软糯带劲；
有人钟意萝卜爽口清甜，有人钟意萝卜煮烂入味；（煮烂入味：即萝卜不用牙齿咬，用舌头和上颚轻轻一压，萝卜便散开，渗出牛杂香味）
虽然我唔可以话畀你知边度牛杂好食，但我可以话畀你知：点样嘅牛杂先值得食！
与公司附近某牛杂大叔对话：
大叔：……我唔敢话我啲牛杂好正，但系一定足料足味！
我：梗系啦，梗系啦，如果唔系我都唔会成日嚟买啦。
（呢位大叔好串…）
大叔：嗱，教精你啦，牛杂好唔好食，一眼就睇得出噶！
一睇煲，煲牛杂就好似冲茶咁，牛杂煲得耐，煲得多，个煲面一定有一层深色嘢噶，个煲新净嗰啲，一定煲得少！
二睇火，睇下佢用煤炉定用炭火，完全唔同味啊！
三睇手势，老板串牛杂剪牛杂唔熟手，搞到啲牛杂旧大旧细，好食极都有限啦！
仅代表大叔意见，
虽然我十分赞同！
最后补充本人一点意见：
牛杂喺广州兴起超过百年历史，“市井美食”自然要喺“市井”寻找。如今通街都有嘅“X状元”、“XX牛杂”，好唔好食，见仁见智。北京路、文明路某一啲小巷里面，我相信你会搵到惊喜！
具体位置
▼▼▼
私聊羊城网阿咩（微信：gznffans）
留言【搵食】
阿咩会拉你入群，成为
【为食自己友】
大把搵食咨询等紧你！
图片来源于网络
最新评论