摘要：如果此篇10万+，阿咩直播支吹活络油！
大家都知，广东天气真系好难顶！
一年四季变幻莫测都算啦，最近几日仲大雨同暴晒随机发放，搞到暴雨预警同高温预警同时发布，于是有咗个新段子——
话唔埋边日广东落嘅唔系雨，而系滚水！直接就白灼咗广东人，咁福建人可以一报以往之仇！
广东天气咁恶劣嘅情况下，广东人系点生存到依家？
除咗靠一身岭南正气，仲多得一系列神奇药水，佢哋就系广东人嘅特级“蓝爸爸”。
**本文所讲述嘅药油药水额外用处收集自网友意见，大家请根据自身情况出发，不要轻易尝试。
双飞人
【官方宣称效用】用于痾呕肚痛、蚊虫叮咬、汤火灼伤、驱风救急、舟车晕浪、除菌除味等用途，外涂内服均可。
神奇之处
香港双飞人官网亦曾宣称双飞人可以用作调味品，喺朱古力蛋糕滴两滴，即可变成薄荷朱古力蛋糕。
据说，真系有唔少香港网民试过，仲有人试过滴落奶茶、柠茶、蒸鱼、朱古力奶、汤等等。
藿香正气水
【官方宣称效用】用于外感风寒、内伤湿滞或夏伤暑湿所致的感冒，症见头痛昏重、胸膈痞闷、脘腹胀痛、呕吐泄泻，肠胃型感冒。
神奇之处
根据阿爆所讲，可以医痔疮，当我问到具体点用，佢就唔肯讲啦……
风油精
【官方宣称效用】清凉，止痛，驱风，止痒。用于蚊虫叮咬及伤风感冒引起的头痛，头晕，晕车不适。
神奇之处
后来有个网红尝试用风油精做不可描述嘅事……
后边发生嘅事，你哋都知道啦。
黑鬼油
【官方宣称效用】用于湿痛骨痛、跌打肿痛、颈紧膊痛、肌肉酸痛、坐骨神经、新旧积痛。
神奇之处
岭南药厂创始人喺祖传红花油嘅基础上创制嘅强效黑色药油，受到皮肤黝黑嘅劳工所喜爱，故被人戏称为“黑鬼油”，不过依家就比较少见啦。
与红花油相比，黑鬼油适应症更广，就算伤口出血亦可使用。如有风湿关节炎，下肢静脉曲张，都可用黑鬼油加水嚟浸脚，效果显著。
驱风油
【官方宣称效用】祛风止痛、芳香通窍、本品用于伤风喷嚏、鼻塞头痛、舟车晕浪、跌打扭伤、肌肉酸痛、蚊虫叮咬。
神奇之处
有人话，驱风油可以用嚟戒烟，食烟之前滴两滴喺最入边，食烟嘅时候有助于提神醒脑，降低食烟欲望，再食第二支烟嘅时候，会觉得口苦，有助于戒烟。
红药水
【官方宣称效用】消毒防腐药。用于表浅皮肤黏膜创面消毒及手术前局部消毒。
神奇之处
有啲广东家长，当自己嘅仔女出水痘，就会搽红药水，会好得比较快。但其实红药水含有汞，不适宜用于消毒大面积伤口，容易造成汞中毒。
X花油
【官方宣称效用】四大花油，各有用处！蚊虫叮咬、四时感冒、跌打损伤、腰肌劳损，乜都得！
神奇之处
呢四种花油，喺老一辈人眼中几乎都系万能，无论咩大病小痛都可以用，我仲有个问题，点解广东人乜花都可以用嚟做药油！
豉油
【官方宣称效用】佢就系一种调味料啊……
神奇之处
从细到大，老人家一直都话烫伤烧伤就搽豉油啦，豉油就被传为民间烫伤膏！
但事实上豉油含有油份，会降低散热令伤口恶化，更有可能将细菌带入伤口，引起眼中发炎。所以呢种方法真系唔可以用！
由于以前物质匮乏、平民冇钱睇医生，加上商家吹捧，好多药油药水被赋予咗大量神奇功效，有啲功效甚至已经脱离现实，误用会危害身体健康。
所以大家都系理智啲，唔好盲目相信民间偏方同讲法，有病最好都系去医院检查下啦！
当你头晕身㷫嘅时候，
你阿妈会畀咩神奇药水你用啊？
素材出自各位自己友提供~
羊城网负责整理编辑
最新评论