正当广州嘅盛夏，每日8杯水，汗都流返8杯，热到连饭都冇胃口食…

laai6 fan2

濑  粉

濑粉呈圆条手指状，短而粗。最早产于1850年代嘅中山。

早期制作濑粉系用稠米浆放入特定嘅壶，喺滚水上方倾倒，米浆从孔中“濑”出又长又韧嘅粉条，入水遇热即成状，得名为濑粉。

 

后来改为先煮熟米粉，搓成粉团放喺槽孔中，用木塞挤压出粉条。濑粉制成之后，要放入冷水中冲洗，然后再煮食。

可能你会怀疑，濑粉“好入口、食得饱、唔觉斋、唔重口”，真系咁紧要？

绝对冇老点！传统广州濑粉用猪骨汤+米浆做成浓稠汤底，加入花生、虾米、叉烧、冬菇、油渣、萝卜粒做配料。濑粉软糯，但唔会滞。肉唔多，但肉香浓，好入口，更加好消化！

紧要：意思同“厉害”。

老点：欺骗。

滞：饱腻感。

单食一碗斋濑粉，虽然食得饱，但斋濑粉味道偏淡，可能会觉得有啲斋、唔够喉，为咗令濑粉嘅口感升级，嗜肉如命嘅广州人加入叉烧、烧鹅、牛丸…濑粉变成一碗冇饭嘅“碟头饭”，一个字：绝！

唔够喉：不过瘾。

绝：意思同“厉害”。

叉烧濑

▼▼

烧鹅濑

▼▼

有人钟意叉烧濑、烧鹅濑，一啖濑粉一啖肉。都有人钟情于斋濑粉，加少少咸菜、少少葱，享受唇齿间嘅“浓香软滑”。好多外省朋友拗爆头，谂唔明广州人点解钟意食咁“杰”嘅濑粉。

拗爆头：苦思冥想。

杰：粘稠。

呢个问题，全广州最出名嘅文明路“老西关濑粉”嘅老板伍文辉咁样回应：我哋西关就系咁食嘅，你钟意食就嚟食，唔钟意就食其他！

老西关濑粉

▼▼

好多人都话“粤菜没落”，濑粉其实都系其中之一。

曾几何时，横街窄巷都有濑粉坐镇，街边走鬼都有濑粉嘅浓香。

时至今日，老广想食濑粉举步维艰，后生一辈偏爱拉面同意粉。

曾经有人建议伍先生，将濑粉汤底“调稀”，加入辣、酸辣口味，但伍先生都一一回绝，坚持传统做法，佢始终相信：钟意食嘅人，一定会返嚟食！

蔡澜先生为“老西关濑粉”题字

▼▼

对于“粤菜没落”呢个命题，鲁迅先生多年前嘅一句话，已经总结咗原因：

「粤菜本没有没落，吃的人少了，也就成了“没落”。」