肠粉，一样外表白璧无瑕，入边包罗万有嘅广东小食，无论系街头巷尾嘅早餐档，定高级堂皇嘅茶楼食肆，你都可以随时拥有一碟肠粉。

最近， 编辑部叫外卖肠粉，然后一碟肉蛋肠就引发咗我哋嘅哲学思考，究竟「鸡蛋肠加肉」同「瘦肉肠加蛋」系咪唔同？

我估你哋睇到呢个问题，心入边肯定喺度谂——

咁你姐系问我，鱼翅捞饭同饭捞鱼翅、梅菜扣肉同扣肉梅菜、蒜蓉炒生菜同生菜炒蒜蓉有咩区别啦！

你咪话，经过我哋讨论同自己友嘅意见，其实「鸡蛋肠加肉」同「瘦肉肠加蛋」真系有区别！

放料先后唔同

「鸡蛋肠加肉」先加鸡蛋，再铺肉碎

「瘦肉肠加蛋」先落肉，再打只蛋喺上面

蛋肉比例唔同

「鸡蛋肠加肉」肉会少啲，因为蛋系主角

「瘦肉肠加蛋」肉会比较多

蛋肉种类唔同

「鸡蛋肠加肉」唔一定加瘦肉，可能加肥肉

「瘦肉肠加蛋」唔一定加鸡蛋，可能加鸭蛋、鹌鹑蛋

价钱唔同

「鸡蛋肠加肉」通常加收两蚊

「瘦肉肠加蛋」通常加收一蚊

选择嘅人唔同

食货会食「鸡蛋肠加肉」，因为咁说明你第一选择系鸡蛋，惊唔饱再加肉

食家会食「瘦肉肠加蛋」，因为咁说明你第一选择系瘦肉肠，讲求食物层次而去加蛋

当薄嫩爽滑嘅肠粉皮，遇到多样饱满嘅馅料、咸甜适宜嘅酱油，一啖落去，丰富嘅层次刺激味蕾，温暖五脏，试问仲有咩比一碟即整嘅肠粉更令人满足。

如果你认认真真睇完呢篇文章，说明你真系好中意食肠粉，咁仲唔快啲依家出去食个肠粉！

当然，我哋关于肠粉嘅哲学思考仲未完……

究竟食肠粉应唔应该落晒啲豉油？

酒楼肠粉比街边贵咁多，同酒楼肠粉多条菜心有冇那冷？

究竟点样先可以完好无缺夹起一条肠粉，而唔使下下整到成乱晒？

各位自己友，

你哋嘅答案又系咩？

图片素材来源于网络

本文看点由羊城网原创