最近，唔少自己友都收到风，黄沙水产市场要同大家暂别。94年出世嘅佢，原来芳龄已廿四啦~

佢曾经系唔少广州人食海鲜嘅首选！但系佢有时都会出现短斤缺两嘅情况……

广州系美食天堂，有好多同黄沙水产市场一样有返咁上下“年纪”嘅食肆，一直系对本地人同游客嘅“味之诱惑”。

我哋经常会见到，以老字号为主题嘅美食推介。

但系有啲曾经辉煌嘅老字号，近几年收到越嚟越多嘅负评。

唔通广州嘅老字号真系开始没落？

聚集多只“为食猫”嘅建六编辑部，决定全体出动，亲自探店！

睇睇有几多老字号发挥稳定？有几多已经开始名不副实？

（以下测评或会受个人主观口味或店家间歇性失手等因素影响，如有不同意见，欢迎留言讨论~）

（有师傅伙计陪你吹水送面）

位于荔枝湾景区嘅一间老字号面店，主打竹升面，店面睇上去古色古香。

【出品质量】

鲜虾云吞只只饱满，可以透过云吞皮见到里面嘅鲜虾，鲜虾甘甜可口、口感弹牙，猪肉味道较浓，稍微抢咗鲜虾嘅风头。

牛腩分量多，且有肉有筋，浓味嘅牛腩汁配上清淡嘅汤底相得益彰。牛腩应该炖煮咗好长时间，入口好容易咬开，而且筋肉部分亦非常软糯。

至于面店嘅重点面条，就冇咗传统竹升面嘅弹牙口感，可能系因为太细碎，面条好似冇精神噉，“软赖赖”趴喺碗度。

最后实名点赞韭黄，佢绝对系云吞面同牛腩面嘅必备品！

【餐厅环境】

店铺内嘅木凳木椅非常有老西关气息~

而店门口就摆有一盒盒码好嘅手工面，工人平时会喺店铺对出嘅空地上面工作。

【其他】

系一间人情味好浓嘅店铺，好多食客同师傅十分倾得埋，而且师傅同伙计都好热情、有礼貌。

但出品未算特别惊艳，亦未有令人回味无穷嘅味道。

（街坊由细食到大嘅鱼蛋粉）

位于骑楼入面嘅一间潮汕风味馆，系附近好多街坊嘅心头好，仲有唔少人打车嚟食，深夜系的哥嘅宵夜热门地之一。

其实主打嘅只系几种汤粉，价格统一，无论咩款都系“大嘅13，细嘅11”。

【出品质量】

番瓜叫嘅系13蚊嘅大杂烩河粉，贪佢咩都有。

配菜有丸、肉卷、白卷、薄脆等，但系牛丸鱼丸系mini版嘅，只匙羹可以装起两粒，且咬落冇弹牙嘅感觉。

薄脆的确够薄够脆，其他配料不过不失。要赞下呢度自配嘅辣椒酱，真系够辣~

但系，食完之后半个钟，你会醒觉汤底真系好咸，一路饮水都仲系口干……

【餐厅环境】

店面尚算阔落，人多嘅时候可能会有啲窄。环境干净，有空调，夏天嚟食碗热嘅鱼蛋粉都唔使怕热~

【其他】

店内冇明显嘅电子支付提示，要开口问收钱阿姨先知。

（食客称可以与银记媲美嘅肠粉店）

系喺西关扎根多年嘅肠粉店，系得到好多网友美誉嘅“网红店”，更系广州米其林嘅推荐餐厅。

只做肠粉同粥，肠粉分大碟细碟，价格亲民。

【服务态度】

最唔想发生嘅一幕始终都系发生咗！

老板真系落错单！

当番瓜同老板讲“我要牛肉肠，你落错猪肉肠啦”，老板只系话：“咁帮你换牛肉肠啰，加1蚊”。我赶时间（穷），我认输。

【出品质量】

喺冇再额外加酱料嘅情况下，呢一粥一肠粉真系咸到怀疑人生……

肠粉嘅口感唔错，有食到米香，但系配嘅豉油真系咸……

粥仍然系好咸，咸到唔知讲咩好。不过粥嘅配料尚算新鲜。

【餐厅环境】

店面有两面直接连接外街，冇空调，夏天嚟食嘢可能会热。

拉肠同煮粥嘅地方系开放式嘅，食客可以喺排队嘅时候睇到师傅煮食嘅过程，番瓜觉得呢点够接地气，系店铺嘅一个亮点。

【其他】

点解落错单，番瓜会咁快投降？

因为喺源记落单，老板会叫你直接将单据畀煮食嘅人，而你自己就排队等，冇单或号码牌作为依据。

师傅嗌到，你就要去攞。所以建议至少两个人嚟食，一个搵位，一个排队，够晒稳阵。

△两个人食到最后嘅战果

（听讲有个“鱼皮西施”）

喺广州好有名气嘅老字号，基本上只要嚟广州旅游就一定会喺度打卡，所以好多人排队。

只卖三种菜品：鱼皮、艇仔粥、猪肠粉。

【出品质量】

鱼皮盛惠25蚊，店员会直接将放喺收银旁边嘅一次性饭盒畀你，里面就系鱼皮。

口感确实不错，但冇外界讲得咁好食，可能店铺出名了质量就会下降。

鱼皮分量唔多，足够一人食，25蚊真系有啲贵。

里面嘅花生非常香脆，酱油亦非常香甜，搭配芹菜香菜可以中和鱼皮嘅腻味，只能讲系中规中矩。

豉油王蒸肠粉只需3蚊，肠粉好滑，皮虽然唔算通透但够薄。

睇落简单嘅酱料却有惊人嘅味道，呢个酱料应该同鱼皮嘅酱料一样，甜甜地，唔系太咸。

经过浸泡之后嘅猪肠粉非常入味，搭配少许芝麻，口感超正！

【餐厅环境】

位于小巷入面，环境狭窄，周围只有电风扇，但系人实在太多，风扇开再大都冇用。

（用一只椰子立足炖汤界）

喺广州讲到炖汤，好多人首先会谂起达扬炖品，佢生意旺起上嚟，成条路都会闻到炖汤嘅香味。

【出品质量】

基本上出锅之前门口就开始排队，最好卖嘅系椰子炖竹丝鸡。

材料炖得比较软烂，汤水味道几清甜，冇食出差评中讲嘅味精味，但上面嘅油确实比较多。

【餐厅环境】

达扬嘅店铺都非常细，一座难求，亦冇空调。

后巷仲有另外一个小铺，位置比街边店面多，只有老顾客先知道点搵，建议夏天去饮汤最好都系打包带走。

【服务态度】

就似一贯嘅广州老店，伙计态度都系比较冷淡，不过大多数人买完就走。

（只有你谂唔到，冇你搭配唔到嘅甜品）

文明路口三大甜品巨头之一，已经有32年历史。甜品品种多到你数唔晒，菜单同规矩全部贴喺店铺门口。

【出品质量】

红豆沙料足又软糯，加上雪糕非常消暑；芝麻糊就稍微有点寡淡，冇红豆沙出彩。

【餐厅环境】

店面比达杨大，但座位一样系非常稀缺，特别系周末，门外基本上都喺度排队，攞完餐再企十分钟等位。

如果点咗容易融化嘅甜品，都系建议打包。

【服务态度】

服务系一如既往地原始、死板又多规矩。

点餐只收现金，唔可以用电子支付，点完餐后递单畀服务员逐个配餐，速度慢又冇人管理。

人多嘅时候容易被人插队，服务员都系黑口黑面，点单嘅人唔太专心。

光顾多年嘅本地人可能会习惯，但唔代表呢种服务模式值得推崇。

（广州最出名嘅“网红”甜品店）

如果外地游客嚟广州旅游，上网做美食攻略，顺记冰室绝对系推荐名单上铁打唔郁嘅一间。

【出品质量】

鲜奶椰汁西米露用杯上，奶味香浓，甜度适中。西米嘅分量好多，几乎占咗1/3，咬落够弹牙。

不足之处系奶味重，基本冇椰汁味，不过价格15蚊嘅佢，性价比唔错。

顺记嘅招牌椰汁雪糕有小小过甜，但系椰子味香浓，口感香滑，冇起冰渣嘅口感。

总体算可以，15蚊一球嘅定价的确偏贵。

【餐厅环境】

作为上下九著名甜品店嘅佢几时都座无虚席，基本上都要搭台。而且游客十分多，再加上行李箱、BB车，环境嘈杂拥挤。

（如果只想食雪糕，可以喺门口直接购买，无需进店消费~）

【服务态度】

大部分出名老字号嘅通病，服务从一而终嘅差。买好嘢，坐定定喺度等食~

（冷门嘅老字号糖水铺）

相比起百花、顺记，呢间开记甜品算系老字号入面嘅冷门，但喺上下九依然有佢一席之地。

除咗糖水，开记仲有卖炖汤添。

【出品质量】

绿豆沙初入口仲可以，但食多会觉得好甜。芝麻糊虽然浓稠但冇咩味道，食唔出芝麻香味；红豆冰亦系非常甜，冇咩特色。

【服务与环境】

服务态度尚可，上菜速度够快，店铺系广州旧街小店嘅风格，比较旧。

总体嚟讲，出品冇咩惊喜，糖水味道偏甜，总体价格偏贵（可能跟临近上下九有关），性价比较低。

时代发展，好多老字号所代表嘅意义有咗好大变化。

对于老广民众，佢哋包含住多年嚟嘅情怀，每一次品尝，都系念旧嘅味道。

对于外来游客，佢哋就变成“网红店”，打完卡、影过相就算。

老字号名声不复以往，出品质量下降，或者一直会有人为咗情怀而坚持帮衬。但系情怀，可以消耗几耐？

老字号要保留传统味道，唔代表唔要服务态度，而系更加要坚守打下江山嘅高出品，先系佢哋真正应该要坚持嘅嘢。

各位自己友

你觉得边间广州老字号开始名不副实？

你点睇广州老字号衰落现象？

欢迎留言同大家分享你嘅为食经历！