全世界每一个国家、每一个民族，都有代表各种文化传统嘅童谣。虽然唔系高雅嘅文学作品，但系蕴含咗每个民族人民嘅思维模式、生产方式、生活方式、风俗习惯同精神等等。

我哋嘅广府童谣都一样，承载咗千百年传统历史，印证住千百年广府文化，最关键嘅一点，广府童谣对儿童嘅健康成长起到积极作用！

反观现代，对传统童谣嘅整理收集不予重视、对现代童谣嘅创作研究更少之又少！依家嘅小朋友最熟嘅歌系咩？《喜洋洋》、甚至系《小苹果》。而我哋从细就唱嘅“落雨大，水浸街”、“月光光，照地堂”，“氹氹转，菊花园”佢哋就接唔到下一句…

究竟我哋应唔应该畀小朋友听广府童谣？废话！我哋更应该了解嘅系，广府童谣会带畀小朋友乜嘢好处。

一、广府童谣反映生活

有点样嘅生活，就会有点样嘅童谣。广府童谣系时代嘅一面镜，都系生活嘅一面镜。就好似《鸡公仔》：

鸡公仔，尾弯弯

做人点可以怕艰难

朝早起床返学去

执齐啲书本去上学堂

呢首广府童谣，描述咗小朋友勤奋好学嘅精神面貌，鼓励小朋友闻鸡而起，勤奋学习。童谣确实会对小朋友生活习惯、学习习惯产生影响，但可惜呢一类勤奋读书嘅广府童谣实在太少太少。

二、广府童谣包含期望

广府童谣有好多种形式，有催眠曲、游戏歌、谜语歌……但系其中有好大部分都包含长辈对下一代嘅期望，就好似《月光光》：

月光光，照地堂

虾仔你乖乖训落床

听朝阿妈要捕鱼虾啰

阿爷看牛要上山坡

阿仔你快高长大啰

帮手阿爷去看牛羊

《月光光》虽然只系一首摇篮曲，听歌嘅小朋友可能连话都未识讲，甚至可能系婴儿，但系呢首经典嘅广府童谣，处处都表达咗对下一代嘅爱意同期望，希望小朋友快高长大，唔奢求佢成龙成凤，只希望佢健健康康，孝顺长辈。

三、重视儿童情感表达

童谣系小朋友嘅歌谣，无论歌词写嘅系大人定系自然环境，童谣始终都系为小朋友而唱，所以表达出小朋友嘅情感就好重要，就好似《落雨大》：

落雨大，水浸街

阿哥担柴上街卖

阿嫂出街着花鞋

花鞋花袜花腰带

珍珠蝴蝶两边排

《落雨大》将场景同情感结合，每个小朋友都肯定见过落大雨，有切身经历同感受，可以通过呢首童谣嚟抒发情感。而且趣致精炼嘅歌词，会令小朋友觉得更加亲切、更加有趣。

广府童谣嘅好处，当然唔止以上列举嘅几点，喺呢度就唔继续深入。但令人觉得可惜嘅系，依家会唱广府童谣嘅小朋友真系少之又少，创作童谣嘅作家亦都越来越少。

最后，想吐槽一首“广府童谣”

（广州举行亚运会之后征集嘅一首）

绿羊羊齐献爱心，亚残有我更精彩。

无声世界不寂静，有我羊羊去比划。

黑暗境地现光明，有我羊羊来诉说。

轮椅行动不迟缓，有我羊羊帮谁扶。

助残扶残我最爱，羊城爱心满街洒。

两个亚运不离开，志愿服务同精彩。

呢首童谣，如果话系广府童谣，一定要加双引号！作者并冇用粤语思维去构思，都冇用粤语语言嚟表达，实在令我感受唔到半点“广府味”。

而且对比传统广府童谣，缺少生动形象、缺乏儿童情趣、语言唔通俗、成人化表述、唔押韵唔通顺……你叫小朋友点唱啊？

希望呢个广府童谣清单里面嘅歌，

我哋唔会系最后一批识唱嘅人！

如果想了解更多广府童谣，

请喺羊城网后台回复【童谣】

来源：《当代广府童谣的状况与价值取向》

——陈字典

刊录六十四首经典粤语童谣

且让妈妈教我唱的歌继续流传下去