今日，同羊城网编辑部几位同事讨论一个问题：

真正嘅“烧味至尊”系咩？

 

阿咩：“梗系蜜汁叉烧啦！几十年来一直都喺我哋张饭枱上面！论材料，虽然只系五花肉，但系无论从酱汁、腌制、做法都相当考究；论情怀，几多广东人从细开始食叉烧，食到儿孙满堂！”

小沅子：“白切鸡都几好啊，虽然严格嚟讲唔算烧味，但系下至街边小饭店，上至五星级酒店，都肯定会有味白切鸡！而且‘无鸡不成宴’，咩场合都唔少得一只鸡嘅！”

阿爆：“烧味至尊，我觉得烧鹅当之无愧！咩材料咩做法都唔讲，净系讲一个‘情’字，加入有客人嚟我屋企食饭，去斩料，我觉得斩只烧鹅会显得尊重啲！势利小小，斩叉烧、白切鸡，就系‘普通朋友’；斩烧鹅，就系‘手足’咯！”

PS：以上纯属三人主观意见，

不喜勿喷，要喷去第度喷！

广州人对烧鹅绝对唔会陌生，虽然家常便饭好少会食烧鹅，但系每逢喜庆宴会，烧鹅几乎就系必备嘅一道菜！

清明时节，拜山祭祖，“拜山三宝”之一嘅烧鹅更加系必不可少！所以俗话讲“太公分猪肉”，其实分嘅唔止乳猪同烧肉，仲有烧鹅。

拜山三宝：乳猪、烧肉、烧鹅。

 

 

讲起烧鹅，“深井烧鹅”唔可以唔讲。而“深井烧鹅”嘅起源地一直都有争议，所以暂不讨论。

“深井”，唔系地名，而系做法。喺地上挖一个坑，睇起身就好似一口井，底堆木炭，吊喺“井”里面烧。由于井周围嘅泥土密不透风，令炉温更加均匀稳定。

深井烧鹅

深井烧鹅

深井烧鹅嘅起源虽然存在争议，但系根据历史记载，烧鹅系源自于烧鸭。

早喺明朝时期，北方有两种烧鸭全国闻名，一系“金陵烤鸭”（用长叉穿起来烧），另一种就系“北京填鸭”（挂在炉里面烧）。最初嘅烧鹅，系模仿“金陵烤鸭”嘅方法。

金陵烤鸭

北京填鸭

但系由于产量过低，所以到咗清朝，一个广东新会古井镇嘅厨师，尝试使用“北京填鸭”嘅做法，结果烧出嚟嘅烧鹅，外表色泽金红，味道浓郁，非常好食。于是就有咗“古井烧鹅”呢个名堂！

古井烧鹅：有记载的历史最悠久的烧鹅，源于广东新会古井镇。距今700多年历史，有正宗烧鹅之称。

烧鹅源自于烧鸭，而且鹅同鸭体型相近，形状都相似，唔少人都将烧鹅、烧鸭捞乱晒。有啲烧腊快餐店利用咗呢一点，明明系烧鸭，就当成烧鹅出售，如果唔系“资深食家”，一时间都难以分辨。

一时难以区分的烧鹅和烧鸭

虽然烧鹅同烧鸭喺制作工艺上，确实相差唔大，但系对于“识食”嘅广州人嚟讲，烧鹅同烧鸭何止相差一两个级数！

差别一：汁水

烧鹅干爽，但食落唔会觉得干身。烧鸭拖汁带水。

 

差别二：肉味

烧鹅肉厚浓郁，烧鸭会有一种“骚味”。

 

差别三：肉质

鹅肉密度高、纹理较粗，结实有弹性；鸭肉比较单薄。

 

差别四：颈长

鹅颈长约一尺，鸭颈较短，约4寸。

 

 

大家尝试判断烧鹅和烧鸭

 

差别五：髀长

鹅髀一般会长过鹅屁股；鸭髀则短过鸭屁股。

 

差别六：毛孔

鹅嘅毛孔较大，鸭嘅毛孔比较细。

除咗以上型、味方面嘅差别之外，烧鹅同烧鸭仲有一个最主要嘅差别，价钱！基本上无论咩时期，一只烧鹅嘅价钱，都大约系一只烧鸭嘅2、3倍以上（所以若然见到十几二十蚊一个烧鹅髀饭，大家心照喇）。

烧鹅烧鸭有咁多差别，都希望各位自己友以后买烧鹅唔好再买错，畀人昆喇！

至于，烧味至尊究竟系叉烧、白切鸡、烧鹅，呢个应该由各位自己友决定！

你心里面嘅“烧味至尊”？

讲出嚟畀大家评下理啦！