我哋广东人除咗有个悭家嘅阿妈之外，

仲有一个特质，就系——

由细畀阿妈吓到大嘅！

你一定都听过唔少啦！

唔知下面有冇你听过嘅？

床下底嘅怪物

特征：专捉瞓觉将手手脚脚伸出被出面嘅小朋友嘅手脚。

阿妈经典语录：手手脚脚唔好伸出嚟，床下底嘅怪物会捉你啲手脚！

一般情况下都即刻将准备伸出被外面嘅手脚缩返埋张被入面。再热都唔敢伸出嚟。

拐子佬

特征：专捉唔听老窦老母话，四围走嘅细路。反正唔听话就会畀人捉走。其升级版为“金鱼佬”！

阿妈经典语录：你再周围走，阵间拐子佬就嚟捉你走，捉你去街边乞食！

一听到要乞食即时黐到阿妈实一实，紧张到不得了。

鸦乌婆

特征：会捉啲唔听话嘅细路走，将佢哋关起身，用嚟乞钱或者捉嚟食。旧时阿妈成日用《糖果屋》个故仔嚟吓吖鸭，所以吖鸭从来冇走失过。

阿妈语录：你啊！快啲瞓觉，再唔瞓觉，到时畀鸦乌婆捉走咗你呢就将你关喺间屋仔度！

为咗逼我哋快啲瞓先讲，虽然我都唔知点解冇瞓觉就要捉人，但细细个真系惊嘎！

依家大咗，

阿妈讲嘅故仔里面嘅鬼怪再都吓唔到我哋，

但你以为你咁就走得甩？

冇傻啦！

成人嘅世界仲加难顶啊！

办公室嘅骑呢鬼你哋实遇过唔少！

所以吖鸭整理咗办公室骑呢鬼集合，

睇下你遇到过几只？

屎忽鬼

（又名“臀部灵魂”）

顾名思义，用个屎忽谂嘢，出尔反尔，做嘢冇样好，仲加鬼鬼祟祟嘅人。

作为最常见于办公室里面嘅“灵魂人物”，成为最“黑人憎”嘅领导人物。

对策：对于呢类同事，都系嗱嗱声走人最好，越少接触越好。

长气鬼

第二个最惊嘅“鬼仔”一定系佢！最钟意日哦夜哦，讲说话重复又重复。

考验你耐性加意志之余，又考你工作效率，因为每日都要花太多时间去理解佢嗡乜。

逢亲同佢讲嘢都要用本簿仔记低自己总结，以前返学上堂做笔记都冇咁认真啊！

对策︰沟通尽量唔好拣午饭后，因为饭气攻心，意志力最薄弱。

腌尖鬼

而第三种腌尖鬼大多数都系完美主义者，佢哋都好做得嘢。

对自己要求极高，而且期望下属或同事都可以达到自己嘅标准，但一唔小心就会变成过份挑剔。

虽然知道系好，但每次沟通都有一股热气流从丹田涌上个脑度，又要用自己嘅耐力将啲怒气压返落去，真系好考验人嘅意志。

对策：遇上要求高嘅同事/上司，某程度上系对自己工作能力嘅磨练。尝试从好嘅方面谂︰如果你连佢哋都应付得到，他日应该冇人可以难倒你。

孤寒鬼

第四种除咗职场更常见于生活当中。但喺职场见到，唔好同佢讲“钱”最好。

曾听闻说一个老世，部门有十几个同事，但过年派利是就拣人派，并非人人有份。其他部门同事心里有数，新正头期间离远见到佢都尽量避开，怕佢以为你要嚟逗利是。

对策：明知道佢孤寒，尽量唔好惹佢就系明智嘅选择啦！

小器鬼

第五种就比较难避免啦！遇着小器鬼，讲说话都要小心翼翼，压力都几大！

同事开下玩笑都会当场黑口黑面，将玩笑放喺心入面，永远记住。对住个同事永远冇好面色。

平时上班咁无聊难免会同同事讲笑，其实大家都当系笑话咁听，不过笑话都系要拣人讲。

对策：办公室内有个方丈，确实要万事小心。正所谓祸从口出，切记慎言！毕竟朝见口晚见面。

人生在世一定会遇上唔少“牛鬼蛇神”，

遇到嘅话就只能自认黑仔，

唯有尽量避免正面起冲突啦！

唔知其中有冇你至“惊”嘅？

不过，喺我心目中，

听过最得人惊嘅古仔都比唔过上头讲嘅

“啱先收到一个新项目，

阵间大家讨论一下思路。”

（为自己默哀3秒钟）