广州人同榕树好有感情，而广州城区亦有唔少古榕树，保护佢哋嘅钱，系唔悭得嘅。

榕树以树高、叶密、冠大而著称。常言讲，独木不成林，但榕树就例外，佢有“独木成林”嘅特点，就算一棵细树，枝叶散开直径就有成个篮球场咁大，大树就更唔使讲喇。正因为佢份份大，所以，好适合广州呢种日晒多嘅地区种植，因为大树底下好乘凉。

以前冇咁多高楼大厦，嗰时大家都系住喺街巷，而每条街巷都会种有一棵大榕树，树下面摆咗几条大麻石，街坊习惯将嗰度叫做“榕树头”。平时大家茶余饭后都中意聚喺“榕树头”唞凉倾偈，呢种情景对于老广州嚟讲记忆犹新。

广州人喜种榕树已经有好长历史，唔少地方嘅老树都系以榕树为主，海幢公园至今仲种住一棵330岁嘅广州最老榕树，而喺大街小巷至今仲保留咗好多“榕”文化，比如六榕寺、六榕路、榕树巷、水榕路、七株榕，呢啲地方都系因为榕树而得名。

明末清初著名学者、番禺人屈大均曾经咁讲过：“故夫望其乡，有乔木森然而直上者，皆木棉也;有大树郁然而横垂者，皆榕也”，所以，如果讲广州嘅市花系木棉花嘅话，咁“市树”一定非榕树莫属。

保护好“市树”，亦都系建设“绿化广州”好重要嘅工作！

来源：花城网（ID：gz_huacheng）