2007年，为咗改善交通状况，“禁摩”似乎系唯一嘅途径。不知不觉，广州市区全面禁摩已经超过10个年头，10年里面，我哋见证住私家车嘅普及，巴士、地铁嘅不断发展。

但“禁摩”对于改善交通情况有冇实际帮助？对于市民出行有咩影响？对于市民正常生活有冇积极作用？

羊城网采访咗9位亲身经历过“十年禁摩”嘅自己友，用佢哋嘅真实经历，将呢段禁摩历史再次呈现。

素材来源：羊城网顾问群

编辑：阿爆

1

嗰时（2007年以前），半个广州都开摩托车，边似依家咁，通街都系私家车。我当时读高中，屋企去学校要行20几分钟，但系飞摩嘅话4、5分钟就到了，两蚊鸡。十年前两蚊鸡可以食到好多嘢嘎，早餐两蚊就饱到想呕！

我觉得个个高中生都同我一样，宁愿瞓多20分钟咯！20分钟喔，一日可以瞓多20分钟，人都精神啲啦！

——张小姐 白领 27

2

全面禁摩前几个月，我就买咗部汽车，宝来06年款。虽然嗰时广州嘅私家车冇依家咁多，但系塞车都系每日例牌菜。禁摩头几日交通状况确实系改善咗小小，不过过咗几日，条路上面嘅单车多咗好几倍，喺车流之间左穿右插……如果唔打醒十二万分精神开车，分分钟都出事！

不过又难怪嘅，虽然话禁摩有过渡期，但无论过渡期有几长，只要全面禁摩嗰日一到，对开摩托车嘅人始终都系当头一棒！你谂下，嗰时广州市区大大话话都有十几廿万部摩托车，至少都有三成系搭客佬，打烂咗几多人饭碗？

——叶老板 商店老板 44

3

禁摩？10年前我就已经举双手双脚赞成啦！嗰时打劫、打人、飞抢（飞车抢劫）…全部违法嘢都系同摩托车有关！一抢完就即刻开走，警察想捉都捉唔到啲贼！

好彩我未试过畀人飞抢啫，嗰啲人几冇阴功啊，抢条颈链，开得飞咁快，将个女人拖咗成百米，个女人都断埋气啊，你话阴唔阴功！我真系情愿佢攞把刀指住我，我乖乖哋畀晒啲钱佢…

——梁姨 退休工人 61

4

禁摩梗系好事啦！不过你话禁摩对交通状况有冇帮助，我又唔觉得有帮助。

啱禁摩嗰段时间，广州好似返到8、90年代咁，周街都系单车…过一排，就开始有三个碌嗰种摩托车，横冲直撞，条路冇车我都唔敢开太快…又过一排，就轮到电瓶车了，同摩托车根本冇分别，系开唔快咁解啫！

嗰时电台交通消息，三朝唔到，两日就有一个开电瓶车嘅畀人撞死！讲真啦，你咪怪我讲得难听，畀人撞死嗰啲电瓶车司机，如果佢哋系开摩托车，话唔定拧一拧油，开快小小就唔会畀人撞啦！

——陈生 国企职员 46

5

有私家车嘅，停车费贵咗！快递，嗰时兴叫速递，速递费又贵咗！就连去大排档食个宵夜都贵咗！

好多人都话唔明，点解禁摩又关大排档事……啲大排档生意再好，其实用料都系差唔多份量，基本上一部摩托车就可以车晒。禁咗摩，咪焗住要买部车咯，唔买车，咪次次都搵人车咯…

一禁摩，乜都贵晒！牵一发而动全身，其实好多市民都受影响！

——昌哥 肉档老板 47

6

好！（禁摩）梗系好啦，冇咁乱吖嘛。只不过，系唔系可以做得有智慧啲呢？嗰时最受争议嘅，其实都系好多人嘅“饭碗问题”，人哋做咗咁多年搭客佬，忽然间要佢哋转行？有咩冇可能啊！

唔止搭客佬，维修摩托车嗰啲师傅呢？摩托车市场嗰班老世呢？就连加油站生意都少咗好多啦…后来咪好多人去咗佛山咯，冇计嘎，人哋维修师傅，一世人就系识得整摩托车，冇车畀佢整，人哋老婆仔女都要开饭嘎！

——梁伯 退休工人 62

7

其实广州交通咁便利，有冇摩托车冇咩区别。广州该塞车就会塞车，同摩托车都冇咩必然关系。不过好明显，飞车抢劫真系少咗好多，治安都好咗，绝对系好事！

但系城中村里面，例如东圃、棠下，仲不时会见到有摩托车！除此之外，仲有嗰啲横冲直撞嘅“便民车”、堆到乱七八糟嘅共享单车、从来都唔响喇叭嘅电瓶车…呢啲取代摩托车嘅产物，更加需要监管！

——叶生 白领 25

8

我都做过搭客佬，禁摩之后我就同个老友夹份，买咗部的士，其实都系做返搭客佬，就系从两个碌变四个碌啫……

开心，好开心！点讲都好，“铁包骨”（汽车）点都好过“皮包骨”（摩托车），都安全好多吖！而且禁摩，的士生意又好咗，搵都搵得多啲！

但系讲返转头，我部摩托车冇报废，一直都喺储物室，话晒我都系靠嗰部烂鬼摩托车养起头家，供仔女读书。冇嗰部摩托车，我乜都冇啊。

——陈生 的士司机 53

9

九几年嗰时咪有出《烈火战车》嘅，刘德华做主角，一红就红咗10年！嗰时好多女仔都钟意男仔有部“烈火战车”（就是摩托车）嘎！如果车技好就更加受欢迎！

……

嗰时好多人出街“片车”（飙车）嘎，我都去过几次，不过依家谂返，真系年少气盛，脑笋都未生埋，好危险，仲会畀警察捉添。

禁摩好，非常好啊！少咗好多危险嘢：飞抢少咗啦、开部摩托车周围走嗰啲唔读书死飞仔又少咗啦！

——张生 个体工商户 44

禁摩十年，

有人话治安好咗，

有人话交通衰咗。

有人话禁摩唔好，

都有人话禁摩系好事。

各位自己友

有摩托车嘅广州 VS 冇摩托车嘅广州

你觉得边个广州更加舒服？