广州一个神奇又神秘嘅城市

上微博热搜居然靠地铁同天气

越来越多嘅外地朋友越发好奇

到底广州系个点样嘅城市呢？

早就帮各位老友记

准备好嗮标准回答喇，

一个优秀又神秘嘅广州，

就靠嗮你哋喇！

从前，

喺广州仲未禁摩嘅时候，

唔单止可以体会到一声声靓仔/靓女嘅呼唤，

仲可以喺万人簇拥、

万分不舍“爱”嘅目光追随下，

体会走红地毡、

粉丝接机嘅人生巅峰时刻。

广州系一个令人

喺一声声靓仔中迷失自我嘅城市。

后来，

你可能会厌弃呢种肤浅嘅问候，

但又会再次喺一声声老世中堕落。

喺广州无论你身高180定系150，

体重80斤定系80公斤，

有头发定系冇头发，

你都可以喺人群中感受到浓郁嘅爱意同夸赞，

一声声靓仔/靓女，

系被人闹咗一日嘅你最好嘅问候。

无论你嚟定系唔嚟，

广州人民都喺原地等住下一位靓仔靓女。

喺广州，

可能体会唔到一世嘅酸甜苦辣，

但绝对能体会到一日内四季轮转。

双十一都冇佢咁严格，

真实跳楼价，

气温简直要跌停。

气温骤降只系基础版本，

衣柜塞满一年四季嘅衫，

连阿妈都唔敢收拾，

先系标准操作。

毕竟系随机播放春夏秋冬，

全靠运气生存落去嘅城市。

今日系5月8号，立夏已过，

但系广州依然长袖加身，

阴雨绵绵，凉风阵阵。

一个夏天着住长袖，

冬天着住短袖嘅城市

广州嘅天气，

靠运气畀季节排期，

畀尽借口买买买，

嚟咗就走唔到嘅城市

——地滑旋转转体720度，滑到走唔到。

▲你喺北方“大雪”纷飞，我喺南方阴雨连绵

广州嘅春天真系湿到冇人有，

一场回南天抢走你屋企里边

二十几条底裤嘅尊严

但系广州嘅春天犹如渣男把口，

话变就变

旧年春天居然冇回南天！

咁屋企嘅抽湿机、干衣机、除湿盒

同埋新买返嚟嘅十几条新底裤

情何以堪！

正当你以为全球变暖嘅危机

波及到广州回南天嘅标签时

今年雨水又杀返嚟广东，

唔单止屋入边湿，

屋外更加系威尼斯上身

晴天娃娃都救唔到嗰种

无论你有咩问题，

口干生疮，骨痛头痛肚仔痛，

抑或系，

心悒发火，失恋失业失心疯，

都会归结到万物本源：

你热气啊，喝凉茶喇。

你以为到处都系黄振龙、平安堂系拿嚟摆噶？

热气，就嚟杯癍痧啦！

不过广州人永远会同你讲：

唔苦，好好喝噶，我哋从小饮到大啊。

最近广州地铁攞咗个全国第一，

单日客流最大，

当之无愧嘅死亡三号线！

魂断体育西，

嘉禾乱葬岗，

决战广州塔，

人间炼狱喺客村。

感受绝冠全国嘅、

充满广州人民独特热情嘅地铁渡劫游戏喇。

永恒哲学三大问题

早餐食咩；

中午食咩；

晚上食咩。

广州人除咗关心三餐，

可能会再加多个下午茶同宵夜咯。

至于买房，

食完先讲啦~

从中国嘅八大菜系到大洋彼岸嘅外国美食；

从天上飞嘅鸽，到地底下嘅水曱甴；

从普通手撕鸡，到世人唔敢埋身嘅鳄鱼……

一箩筐嘅美食，等你80斤嚟，80公斤走；

▲烧乳鸽

▲鳄鱼肉

要积极向福建朋友推介广州，

因为我哋唔单止食细路仔（煲仔饭），

食人头（人头饭），

食老婆老公（老婆饼、老公饼），

还食福建……人民土特产

你永远都唔知

广州街头着住白色背心、沙滩裤嘅阿伯，

同你喺超市抢10元均一嘅阿婆，

系为咗悭钱定系兴趣；

公司里面敬业打扫嘅阿姨，

日日嗌穷嘅同事，

上班系为咗赚钱定系热爱。

广州嘅曱甴唔单止识爬识飞，仲劲大，劲吓人。

一只广州曱甴更比六只北方曱甴强！

当广州人发现对方唔识讲粤语时，

唔理自己普通话有几差，

都会努力同对方讲普通话。

就算畀人笑煲冬瓜都要讲啊！

（你直走，然后下楼梯）

广州系一个经济发达但负担冇咁重，

生活质量较高但消费冇咁贵嘅城市。

舒舒服服咁行喺街上，

路过玩下猫仔，几快活啊！

广州比较佛，

日日被人话要落后边个边个啦。

但系更睇重生活嘅广州人总会咁回答：

“有咩事等我饮完茶再倾喇。”

喺广州人眼里边，

奋斗就系为咗更好生活，

本末倒置嘅行为只会改变初心，

到头嚟生活工作两头空。

“其实呢，做人最紧要系开心！”

 各位自己友，

你哋又会点介绍广州呢？

我哋喺留言区等住你嘅盏鬼发言啵~