“糯米鸡”，广东人饮茶必叫点心。咁糯米鸡入边，应该放咩先正宗？
糯米鸡起源于解放前广州嘅夜市，最初以碗蒸熟而成，后来改为用荷叶包住。
传统糯米鸡由荷叶（用底面，而非上面）包住糯米、鸡肉、香菇、笋片等材料蒸制而成，荷香扑鼻，香滑鲜美。
一只糯米鸡约有三四两饭，所以糯米鸡都经常广东人当作早点，食一只糯米鸡就足以应付一朝早嘅能量消耗。
但系，自从开始买糯米鸡嚟做早餐，我对糯米鸡嘅印象同期待值就发生翻天覆地嘅变化！
我觉得最好嘅糯米鸡系咁——
我以为正常糯米鸡系咁——
粗粗哋，咁我都可以接受——
点知实际上系咁——
▲老细，我啲鸡呢？
我啲腊肠呢？
我啲虾米呢？
我啲瑶柱呢？
你全部攞咗去煲汤啊！！！
世界上最遥远嘅距离，唔系生与死，而系图片仅供参考，一切以实物为准。
——克里斯汀·阿咩
最令我无语嘅系，几奇葩、几无厘头嘅馅料都可以喺糯米鸡入边搵到，有啲离谱仲要离谱到你唔信！
饭堂牌糯米鸡
▲一块腊肠，一片冬菇，一嚿带骨嘅鸡，所有馅料都带有熟悉嘅味道，唔系阿妈嘅味道，而系寻日中午卖剩嘅冬菇蒸鸡嘅味道……
肥猪肉糯米鸡
▲我买嘅系糯米鸡，唔系糯米猪，用肥猪肉做馅，你以为咸肉粽啊！有冇谂过糯米鸡嘅尊严！！！
蟹柳糯米鸡
▲大道理我都明白，就系点解会有嚿蟹柳……系咪行错片场……
老干妈糯米鸡
▲咩我都可以忍，依下就事关原则问题啦，老细你同我解释下老干妈系咩回事！
鹌鹑蛋糯米鸡
▲我嘅咸蛋黄呢？点解得只原只清蒸鹌鹑蛋……老窦唔得闲，嗌个仔嚟代班啊！
火腿肠糯米鸡
▲嚿火腿肠又系乜鬼啊……荡失路啊……
排骨糯米鸡
▲阿sir，我要举报，呢度有嚿排骨非法侵占我只糯米鸡！
人生就好似拆糯米鸡咁，你永远唔知入边会系咩。
——克里斯汀·阿咩
本来馅料可以咁多花神，我就已经好佩服，点知有一日发现，啲厨师将魔爪伸向糯米鸡块荷叶皮……
然后就出现咗啲新品种糯米鸡——
蛋皮糯米鸡
▲我估你学名系糯米鸡庵列，其实已经同嚿饭团冇咩区别啦！
酥皮糯米鸡
▲今次真系糯米鸡睇咗会沉默，菠萝包睇咗会流泪……
香煎糯米鸡
▲糯米鸡攞嚟香煎……乜你咁冇创意噶，梗系去盐焗啦……
你哋系得嘅，阿咩我甘拜下风！
虽然上边嘅糯米鸡之中，有啲可能睇起身奇葩，但系实际上味道唔错，不过始终我相信好多广东人最中意嘅，依然系最传统嘅糯米鸡！
所以，都系唔好搞咁多套路，毕竟，我就系想简简单单、正正常常食只糯米鸡！
其实食糯米鸡，就好似做人咁，都系简简单单最好！
——克里斯汀·阿咩
最后问自己友一条哲学题，
你哋认为，
真正嘅糯米鸡有冇鸡？
图片素材出自网络
羊城网负责整理编辑
最新评论