对很多广州人而言，广府童谣意味住欢乐同怀旧。但时至今日，细路仔仍朗朗上口嘅广府童谣可能只有《月光光》、《落雨大》、《鸡公仔》几首…最经典、最鬼马、最好玩、最家常嘅童谣你仲唱得出几多？今日，阿咩就带你重回顽童时代！
【月光光照地堂】
月光光，照地堂，
年卅晚，摘槟榔，
槟榔香，摘子姜，
子姜辣，买菩达，
菩达苦，买猪肚，
猪肚肥，买牛皮，
牛皮薄，买菱角，
菱角尖，买马鞭，
马鞭长，起屋梁，
屋梁高，买张刀，
刀切菜，买箩盖，
箩盖圆，买只船，
船浸底，
浸亲两个番鬼仔！
一个浮头（一个摸慈姑），
一个沉底（一个摸马蹄）。
【月光光照地堂】
月光光，照地堂，
虾仔你乖乖瞓落床，
听朝阿妈要赶插秧咯，
阿爷睇牛佢上山冈。
虾仔你快高长大，
帮手阿爷去睇牛羊。
月光光，照地堂，
虾仔你乖乖瞓落床，
听朝阿爸要捕鱼虾！
阿嫲织网要织到天光。
虾仔你快高长大，
划艇撒网就更在行。
月光光，照地堂，
年卅晚，摘槟榔，
五谷丰登堆满仓，
老老嫩嫩喜洋洋啊，
虾仔你快啲眯埋眼，
一觉瞓到大天光啊。
【落雨大，水浸街】
落雨大，水浸街，
阿哥担柴上街卖，
阿嫂出街着花鞋。
花鞋花袜花腰带，
珍珠蝴蝶两边排。
排排都有十二粒，
粒粒圆亮冇疵瑕。
【氹氹转，菊花园】
氹氹转，菊花园，
炒米饼，糯米圆。
阿妈带我睇龙船。
我唔睇，睇鸡仔。
鸡仔大，捉去卖。
卖得几多钱？
卖得三百六十五个仙。
【排排坐，食粉果】
排排坐，食粉果，
猪拉柴，狗烧火，
猫儿担凳姑婆坐，
坐烂个屎窟唔好赖我，
赖翻隔篱个二叔婆。
【大笨象，揸支枪】
大笨象，
揸支枪（臭松香），
去打仗（揸支竹仔去打仗）。
打完仗，
返嚟食碗辣椒酱，
隔篱屋企烧炮仗，
问你响唔响，
唔响升你两巴掌。
【又喊又笑】
又喊又笑，
乌蝇打醮，
蠄蟧濑尿，
老鼠行桥，
行到西门口，
畀人打啰柚。
【落雨溦溦】
落雨溦溦，
水浸田基。
田基有条蛇，
吓亲大老爷。
大老爷揸支枪，
吓亲个缠脚娘。
【卖羊卖咩】
卖羊卖咩，
卖到老鼠担遮。
狗仔忙住去拉蛇，
蛇摆尾，似风车，
风车氹氹转，
番鬼扒龙船。
扒得快，好世界，
扒得摩，无鼻哥。
【肥佬肥揗揗】
肥佬肥揗揗，
买舊猪肉去拜神，
行到半路屎窟痕，
返到屋企瓜老衬。
【萝卜头】
萝卜头，点豉油，
点得多，咸过头，
点得少，淡茂茂。
【河边有只羊】
河边有只羊，
羊边有只象，
象边有只马骝仔，
好似你咁样。
【猪婆婆】
猪婆婆，
卖菠萝，
卖畀地主做老婆。
地主唔要佢，
一脚将佢踢落河。
执翻上嚟晕酡酡。
【点虫虫】
点虫虫,
虫虫飞。
飞到荔枝基。
荔枝熟，
摘满屋，
屋满红，
伴住个细蚊公。
【猜呈寻】
呈寻剪，呈寻包，
呈寻糯米叉烧包。
老鼠唔食炸药包，
执到粮票买面包。
【伏匿匿】
一就预备，
二就匿埋，
三就开盘，
四就嚟到，
砰到算数。
【点指兵兵】
点指兵兵，
点着谁人做大兵，
点指贼贼，
点着谁人做大贼。
【麻鹰飞】
折纸机，
麻鹰飞，
飘嚟飘去唔落地，
麻鹰有条尾。
【煮饭仔仔】
煮饭仔仔先落米，
风炉透火柴对齐，
千祈唔好咁拿西，
我哋唔系细蚊仔。
【嗳姑乖，嗳姑大】
嗳姑乖，嗳姑大，
嗳大个姑仔嫁后街。
后街有鲜鱼鲜肉卖，
又有红皮屐仔绣花鞋。
又有鲜花戴，
戴又戴唔晒，
丢落床头畀老鼠拉。
一拉拉到大新街。
大人执到笑眯眯，
细路执到当银牌。
【鞥咕咕，淋慈姑】
鞥咕咕，
担水淋慈姑，
淋得慈姑瓜咁大，
人人都话阿姑乖。
【五更鼓】
初更鼓，响叮当，
叮叮叮咚叮叮当。
入绣房。
绣房有只乜嘢叫?
有只蚊公叫。
蚊公点样叫?
嗡嗡嗡嗡嗡嗡叫。
二更鼓，响叮当，
叮叮叮咚叮叮当。
入绣房。
绣房有只乜嘢叫?
有只老鼠叫。
老鼠点样叫?
吱吱吱吱吱吱叫。
三更鼓，响叮当，
叮叮叮咚叮叮当。
入绣房。
绣房有只乜嘢叫?
有只猫仔叫。
猫仔点样叫?
喵喵喵喵喵喵叫。
四更鼓，响叮当，
叮叮叮咚叮叮当。
入绣房。
绣房有只乜嘢叫?
有只狗仔叫。
狗仔点样叫?
汪汪汪汪汪汪叫。
五更鼓，响叮当，
叮叮叮咚叮叮当。
入绣房。
绣房有只乜嘢叫?
有只鸡公叫。
鸡公点样叫?
喔喔喔喔喔喔叫。
【三更灯火五更鸡】
三更灯火五更鸡，
正是男儿用功时。
少年不知勤学早，
老来方恨读书迟。
【姑丈担凳】
姑丈担凳孩儿坐，
孩儿坐落就劏鸡。
鸡会劏门前喔喔啼，
不如劏只鸭；
鸭又嫌鸭毛多，
不如劏只鹅；
鹅又嫌鹅颈长，
不如劏只羊；
羊又嫌羊脚叉，
不如劏只马；
马会送君出埗头，
不如劏只牛；
牛会耕田养人口，
不如劏只狗；
狗会东西方有人嚟都知，
不如劏只大猫儿；
猫儿又会捉老鼠，
不如劏只大肥猪；
肥猪会食主人三斗禄，
主人食佢三舊肥猪肉。
【打开蚊帐】
打开蚊帐，
打开蚊帐，
有只蚊，
有只蚊，
快啲攞把扇嚟，
快啲攞把扇嚟，
泼走佢，
泼走佢。
打开蚊帐，
打开蚊帐，
有只猫，
有只猫，
快啲攞支竹嚟，
快啲攞支竹嚟，
吓走佢，
吓走佢。
【初一人拜神】
初一人拜神，
初二人拜人，
初三是赤口，
初四人乞米，
初五初六正是年，
初七游花地，
初八八不归，
初九九头空，
初十打春去。
十一打仔回，
十二搭灯棚，
十三人开灯，
十四灯火明，
十五祈完灯，
采青走百病。
【卖懒】
(一)
卖懒，卖懒，
卖到年卅晚，
人懒我唔懒。
(二)
卖懒，卖懒，卖到年卅晚；
卖穷，卖穷，卖畀猪婆龙；
卖衰，卖衰，卖畀大头龟。
【我有几文鸡】
我有几文鸡，
过年买只鸡。
只鸡好好食，
夹畀阿妈食。
阿妈话我乖，
带我行花街。
【食嘢唔做嘢】
食嘢唔做嘢，
做嘢打烂嘢。
【丑丑丑】
丑丑丑，丑丑丑，
丑甩耳仔餸烧酒。
【肥婆跳舞顶第一】
一二三，三二一，
肥婆跳舞顶第一。
来源：广州日报
童说岭南系列丛书
《街巷探秘》、《广饮广食》、《小脚走古迹》
同小朋友一齐分享好多广州人都唔知嘅古仔！
微信扫描二维码，随时召唤彭嘉志讲古
羊记杂货铺老友价：￥80
购买方式
淘宝购买：长按网址“http://t.cn/R4aXtHe”复制至浏览器打开
微信购买：请点击左下角【阅读原文】或长按以下图片识别二维码进入微店。
自提购买：广州越秀区建设六马路29号荣建大厦17G，请提前一天电话预约。
联系电话：020-83195715-805，团体一次性采购20本以上或批量定制享受更多优惠，欢迎来电咨询。
最新评论