由于上星期发太多TVB嘅推文，畀自己友控诉，所以阿咩就规规矩矩发咗一个星期粤语内容，就等今日TVB台庆颁奖礼，先发返一篇咁多嘅TVB推文。
今年已经系TVB 台庆50周年，不过就只系第20届嘅台庆颁奖典礼。
TVB第一届颁奖典礼系喺1997年，搞个颁奖典礼系由于90年代后期竞争压力加大，TVB艺人陆续离开。
为咗奖励艺人，TVB从97年开始喺台庆引入颁奖环节，推出咗《万千星辉颁奖典礼》，颁发最佳男女主角（就系俗称嘅视帝同视后啦）等奖项。
TVB台庆颁奖典礼走过咗近20年，先后诞生咗11位视帝同16位影后。
▲视后人数太多，放唔晒
今日阿咩就盘点下历年视帝视后之最。
反差最大视帝——郭晋安
获奖履历：2014年 《忠奸人》、2005年《阿旺新传》、2003年《憨夫成龙》
2014年郭晋安凭借《忠奸人》嘅高哲行一角第三次夺得视帝，追平罗嘉良同黎耀祥，而喺所有视帝之中，郭晋安夺视帝嘅角色可以算系最大反差。
郭晋安前两次夺视帝都系凭借天真可爱嘅“傻仔阿旺”，而《忠奸人》嘅高哲行反而系表面谦和正义，内心黑暗扭曲嘅大律师。
高哲行并唔系郭晋安第一次饰演反派，阿咩记忆之中佢第一次做反派应该系《笑看风云》。
不过最令阿咩印象深刻嘅反派系《与敌同行》之中嘅唐立言，角色奸得出汁，最后入狱都不知悔改，一个眼神就系可以令人不寒而栗。
▲当年几多人畀结局呢幕吓亲
其实郭晋安85年就出道，不过一直不温不火，直到03年嘅《憨夫成龙》先一炮而红，跃居一线小生。
咁多年，郭晋安嘅戏路都非常广，从正义凛然嘅警察、古灵精怪嘅侦探、天真可爱嘅傻仔，到后来一次次挑战奸角反派，郭晋安嘅演技越嚟越炉火纯青，反差再大嘅角色都可以驾驭自如，果然系获得“千面小生”称号嘅男人。
最后送两张私家珍藏郭晋安表情包畀你哋（其实你哋知唔知，郭晋安系60后，今年已经52岁啦…）
最爆冷视帝——黄子华
获奖履历：2013年《MY 盛 LADY》
大家应该仲有印象，2013年嘅视帝角逐，好多人都以为视帝应该系台庆剧《冲上云霄2》嘅张智霖或者吴镇宇当选，点知最后竟然系黄子华爆冷夺得视帝！仲要喺颁奖礼上，黄子华系缺席冇到。
而最搞笑嘅系，宣布视帝系黄子华之后，Do Do姐现场打电话连线黄子华，黄子华第一句就系
“Do Do姐？哇~你好似一两年冇打过电话俾我啦喔。”
得知自己夺得视帝之后，黄子华又讲：
“最佳男主角即系咩啊，系咪即系视帝啊？定视后？咁点解我会攞咗个最佳男主角啊？系咩人去选我出嚟噶？”
Do Do姐同佢解释完当年嘅赛制后，黄子华开玩笑讲：“呢啲（人）好专业啊!”，连黄子华本人都冇预计到自己会做影帝，觉得自己纯粹陪跑。
科普：2013年之后，TVB颁奖典礼最佳男主角、最佳女主角、最佳剧集嘅评选制度变成：由观众投票（民选票数）及逾八百人组成嘅专业评审（无线内部票数）投票，以各占一半评分选出。
之所以话黄子华得奖系爆冷门，唔系话剧集唔好睇或者黄子华演技太差，最大原因莫过于系颁奖礼举行嘅时候，《MY 盛 LADY》都未播完，又唔系台庆嘅力推剧集，反而最后视帝花落黄子华，真系呢几年颁奖典礼最大嘅冷门。
科普：一般颁奖典礼举行期间或者之后播放嘅剧集，都系炮灰剧集，基本无缘奖项，比如而家播紧嘅《流氓皇帝》
最辉煌视帝——罗嘉良
获奖履历：1997年《难兄难弟》，1998年《天地豪情》，2002年《流金岁月》
1997年，TVB举行第一届万千星辉颁奖典礼，罗嘉良凭借大热剧《难兄难弟》中“李奇”一角获得第一个视帝奖座（顺便提下，TVB第一个视后系关咏荷），之后1998年，罗嘉良凭借《天地豪情》再获视帝，连庄视帝成为一时佳话。
到2002年，《流金岁月》令罗嘉良斩获人生中第三个视帝讲座，成为TVB首个三届视帝，一直到黎耀祥喺2012年先追平。
目前视帝记录
三届：郭晋安、罗嘉良、黎耀祥
两届：古天乐、郑嘉颖
目前视后记录
两届：邓萃雯（连届）、佘诗曼、汪明荃
【按照姓氏字母排序】
获得三届视帝之后，罗嘉良被封为TVB一哥，风头一时无两。罗嘉良嘅演技不容置疑，收放自如，举手投足都可以将角色演得入木三分，所以话三届视帝，实至名归。
之后罗嘉良转战内地，名声变弱，佢冇喺内地影视界之中占得一席之地，而大部分人提及最多嘅依然系佢喺TVB嘅剧集。
罗嘉良获三届视帝嘅几年，除咗系罗嘉良嘅事业巅峰期，同时亦都系TVB最后嘅辉煌期。而喺罗嘉良离开后嗰几年，TVB开始走向衰落。
几年之后，罗嘉良返TVB拍《富贵门》，剧集质量同影响已经不复当年，《富贵门》可以话系TVB妄想复制自己巅峰嘅失败之作。
喺阿咩睇嚟，罗嘉良演艺经历嘅起起落落，何尝唔系TVB发展嘅缩影。
最破天荒连庄嘅视帝视后
——黎耀祥、邓萃雯
获奖履历：2010年《义海豪情》、2009年《巾帼枭雄》
TVB历史上出过一对，同时系唯一一对连庄嘅视后视帝，仲要系视帝视后均出自同一部剧集，就系邓萃雯同黎耀祥。
2009年《巾帼枭雄》系颁奖礼嘅最大赢家，2010年《义海豪情》继续称霸颁奖礼，视帝黎耀祥同视后邓萃雯破天荒双双蝉联，可以话史无前例。
《巾帼枭雄》《义海豪情》系黎耀祥、邓萃雯同一众老戏骨共同缔造出嚟嘅奇迹，呢两部剧嘅成功，经常令阿咩不由自主联想起《伪装者》《琅琊榜》，同一个制作团队出品，演员重合度同样都好高，但系最后嘅两个成品都令人惊喜。
《巾帼枭雄》同《义海豪情》令黎耀祥从两三线演员，马上升为一线大咖，从此成为TVB嘅头牌男一号，担纲出演多部台庆剧。
而邓萃雯更加唔使讲，阿咩心目中演技派女神，睇《金枝欲孽》时，佢饰演霸气张扬嘅如妃，就已经令我爱上佢。
而到咗《义海豪情》入边亦正亦邪嘅九姑娘，喺阿咩心目中简直系称神，近十年最中意嘅TVB女主角，九姑娘永远系第一位。
呢对连庄嘅视帝视后，既系众望所归，又系实至名归。
最具争议视帝——郑嘉颖
获奖履历：2006年《天幕下的恋人》、2011年《怒火街头》
2006年嘅时候，郑嘉颖凭《天幕下的恋人》获得首个视帝，瞬间骂声四起，无数质疑声指向佢，觉得佢未够资格，评选肯定有黑幕。
其实都难怪外界咁批评，毕竟当年入围视帝嘅系下边呢啲人。
2006年最佳男主角五强
郑嘉颖《天幕下的恋人》
林 峰 《女人唔易做》
林保怡《火舞黄沙》
陈 豪 《火舞黄沙》
马德钟《凤凰四重奏》
一方面，《女人唔易做》系年度话题剧，引发全城热议，而《火舞黄沙》更加系重推嘅台庆剧集，一众《金枝欲孽》班底出演，《凤凰四重奏》虽然相对较弱，但系都算系有深度嘅跨年代剧。
而《天幕下的恋人》只可以算系青春爱情剧，而且收视仲要几乎垫底。
另一方面，林保怡、陈豪系《火舞黄沙》嘅演技真系好，成为视帝嘅大热门，林峰同马德钟虽然相对较弱，不过佢哋系戏入边嘅演技明显有进步。
而郑嘉颖喺《天幕下的恋人》嘅角色沈朗，完全系偶像剧男主角，小生角色，冇乜亮点又冇乜突破，点睇挪视帝都未轮到佢啦。
所以知道公布视帝得奖者嘅时候，郑嘉颖嘅表情一啲都唔开心。
之后，郑嘉颖承受咗好多负面攻击，被称为演技最差、最冇含金量嘅TVB视帝，而到咗2011年，郑嘉颖终于打咗一场漂亮嘅翻身仗，凭借《怒火街头》再获视帝。
Law霸一角，突破咗郑嘉颖以往嘅小生角色，系一个不修边幅，猥琐麻甩，但系内心正义，开朗搞笑嘅草根律师，郑嘉颖脱胎换骨嘅演技感染咗观众，使得佢以大票数当选三料视帝，今次终于再冇人质疑佢嘅演技，再冇人话佢个奖系黑幕。
争夺最激烈视后——黎姿
获奖履历：2004年《金枝欲孽》
2004年，宫斗剧始祖《金枝欲孽》横空杀出，引起全国上下嘅追捧，被誉为中国宫斗剧嘅巅峰之作，之后嘅《甄嬛传》都冇办法超越佢嘅地位。
《金枝欲孽》入边嘅女性角色，各具特色，个个经典，所以嗰一年嘅视后争夺，亦都系有史以来最激烈。
大热门分别系邓萃雯、黎姿、佘诗曼，嗰时有传言黎姿同佘诗曼代表咗TVB高层曾励珍、乐易玲两派势力，所以边方得视后，说明边派势力大。
最后当选嘅系黎姿，呢个奖项，成为佢离巢之前获得嘅第一个同最后一个视后。
玉莹呢个角色美艳聪明，孝顺执着，又颇有城府，黎姿的确演绎都好好，我认为玉莹系黎姿演技嘅巅峰，其他任何一个角色都冇办法比拟。
当时，好多人都为邓萃雯同佘诗曼唔抵，不过阿咩觉得《金枝欲孽》每个角色都咁出彩，而奖项一个，肯定有人欢喜有人愁，而且后来邓萃雯同佘诗曼都成为两届视后，说明只要有演技，始终都畀人睇到，始终会得到认同。
最无须证明视帝——欧阳震华
获奖履历：2000年《洗冤录》
提到欧阳震华，必然第一反应系佢嘅TVB剧集嘅角色，从细到大，欧阳震华为我哋塑造咗好多经典嘅角色，《醉打金枝》嘅郭暧、《陀枪师姐》嘅陈小生、《洗冤录》嘅宋慈、《法证先锋》嘅高彦博、《赌场风云》嘅齐欢畅等等。
不过，实际上欧阳震华喺TVB咁多年，只获得过一次视帝，就系喺2000年凭《洗冤录》斩获视帝，之后一直提名，一直落选。
欧阳震华演技唔差，而且观众缘又好，所以包括阿咩在内嘅好多观众，都会觉得佢剩系攞好可惜。
但系认真惗下，TVB咁多有实力嘅演员中，都有好多从未攞过视帝视后，比如江华、张智霖、林峯等，咁我哋就会觉得佢哋唔应该继续做演员咩？
其实，奖项从来唔系证明演员演技嘅唯一途径。
演艺界依然有好多隐藏嘅视帝视后，可以攞奖固然系锦上添花嘅荣耀，就算冇奖，我哋依然咁敬佩感激佢哋嘅付出。
至于今晚嘅颁奖典礼，
阿咩心目中嘅奖项得主如下（只论演技）
最佳男主角：陈展鹏/黄宗泽
最佳女主角：胡定欣
最佳男配角：曹永廉
最佳女配角：王君馨/龚嘉欣
最佳剧集：《城寨英雄》
各位自己友，
你哋心目中嘅视帝视后人选又系边个？
历年视帝视后，你哋最中意边个？
留言话畀我知啦！
图片素材来自网络
本文看点由羊城网原创
最新评论