最近网剧版《无间道》上线，作为一个资深剧迷嘅小沅子，本身想正正经经写篇影评，话晒《无间道》系2000年以来最好嘅警匪片，我童年嘅经典回忆。
然后，我打开睇咗一集网剧版，我想做嘅第一件事唔系插盲自己对眼，系想插聋自己对耳！
作为一个土生土长、从细讲粤语嘅广东人，我想对网剧版《无间道》讲三个字——
作为一个粤语公众号，今日我哋唔讲剧情，就从配音同台词嚟批判下呢部网剧《无间道》！
首先，网剧版《无间道》喺香港取景拍摄，从主演到配角，绝大部分都系我哋熟知嘅香港演员，剧情细节好多都系港剧嘅套路。
但系你可以想象，所有人一律用国语播音腔配音！从警察局阿sir到街边卖报纸阿叔，讲嘅普通话仲标准过你同我。
我明明见到一群香港演员口型系讲紧粤语，但系佢一个个发出嘅都系字正腔圆嘅普通话。
特别提醒，廖碧儿嘅国语配音十分极其非常难听，为咗各位自己友嘅身心健康，都系唔好去感受。
其次，你话你讲国语咪讲国语咯，讲国语可唔可以畀啲心机翻译，唔好就咁直接用国语讲粤语。
比如，有一句嘅字幕系“转眼间就毕业”，然后配音系“转眼间就passing out”，呢句话系纯国语读出嚟噶——
▲Passing out系指警校毕业嘅结业会操
我唔该你，结业会操咪读成结业会操咯，做乜要扮晒嘢，讲到又中又西，你又唔系唔知普通话同英语加埋一齐剩系会畀人觉得尴尬。
咁都未系最呕血嘅翻译，后来审问犯人嘅时候，罗仲谦嘅配音用国语讲咗一句——
“不是自己身上有屎，
你怎么会逃跑……”
我当时嘅表情系——
我知道你想表达“你唔系自己身有屎，你会走？”，但系你可唔可以换个表达方式，你以为普通话嘅“身上有屎”真系等于粤语嘅“身有屎”。
你咁讲嘢，行喺广州绝对畀人当场打死咯！
跟住，某啲配音同字幕，又会冇啦啦用返国语。比如，古惑仔爆粗嘅时候，配音系“靠”——
又比如，明明都读成“张sir”，然后字幕翻译系“张队长”……
张队长，如此浓厚嘅社会主义价值观气息，搞到我仲以为睇紧一部抗日剧……
至于喺香港用微信通讯，大陆过嚟嘅主角可以冇障碍睇得明粤语繁体写嘅日记，我都已经唔想再吐槽……
到今日，我终于明白，咩叫冇对比就冇伤害，一对比起身，TVB嘅国语配音组系几咁敬业又专业。
虽然我睇港剧首选语言肯定唔系普通话，但系我唔多唔少都睇过国语配音嘅港剧。港剧嘅经典配音员，今日必须要介绍下畀你哋知啦！
杜燕歌
上世纪80年代参加唱歌比赛加入演艺圈 ，90年代加入TVB国语配音组，创造无数经典，有话筒前嘅影帝之称。
古天乐、罗嘉良、刘松仁、江华、黄子华、黄日华、张智霖等御用配音员。
近年逐渐走向幕前，出演多部TVB剧集，并担任重要角色。其妻子为TVB著名演员韩马利。
潘宁
潘宁系香港著名电影、电视剧国语配音员，同时都系TVB 配音组第一个为全部六大花旦配过音嘅人，有“TVB配音一姐”嘅称号。
六大花旦配音包括：宣萱[阿SIR,早晨，1994]，郭可盈[刑事侦缉档案，1994]，张可颐[新上海滩，1996]，蔡少芬[ 壹号皇庭5，1997]，佘诗曼[生命有TAKE2，1999]，陈慧珊[冲上云霄，2003]。
05年以后潘宁主攻中年角色，成为米雪、邓萃雯等视后级艺员嘅御用配音，间中都会兼顾唐诗咏和李诗韵等小花旦嘅配音。
张艺
1994年进入配音界，1997年加入香港TVB，现为TVB首席配音师，并担任配音导演。
先后为林峯、林文龙、吴卓羲、梁朝伟、郭富城、张家辉、谢霆锋等香港男演员献声。
于小华
于小华，TVB所有女配音演员中资历最老嘅艺员，从《上海滩》到《西关大少》，于小华把声如30年前一样清脆，她绝对算得上系香港国语配音界一个里程碑式嘅人物。
她配音嘅人物性格差异非常大，有温柔典雅嘅冯程程，不食人间烟火嘅小龙女，精灵俏皮、冰雪聪明嘅苏樱，温婉恬静、清丽脱俗嘅周芷若，仲有康敏、何红药、梅超风等毒妇角色，或者杨贵妃呢种历史人物。
黄河
四川成都人，香港著名国语配音演员，男高音歌唱家。其配音戏路极广，无论系《创世纪》中嘅叶荣晋，《天龙八部》萧峰，定系《倚天屠龙记》中嘅谢逊，少、中、老年均可驾驭。
张济平
张济平，香港著名配音演员，74年与冯雪锐,廖静妮等一齐加入邵氏兄弟电影公司国语配音组，开始配音生涯，八九十年代成为香港配音界的中流砥柱。
张济平天生声线铿锵雄浑，多为老人配音，而佢曾经喺《英雄本色》中为周润发饰演嘅小马哥进行配音。
冯雪锐
香港国语配音界有两位不能忘却嘅人，一个系张济平，另一个系冯雪锐。
冯雪锐 ，香港著名配音演员同配音领班（配音导演），系当年徐克所拍电影嘅御用配音领班。代表作品：《英雄本色》《A计划》元彪、《笑傲江湖》令狐冲。
TVB配音组仲有好多有实力嘅资深配音员，如小小、卢琨、王逊、苏柏丽、黎泓和、李娟、刘印生、陈元等，由于时间关系，就唔一一列举啦。
因为有咁样一班配音大师喺度，先令到我哋睇国语版嘅港剧，唔会令人反感，反而仲有阵阵韵味。
讲真，网剧版《无间道》嘅配音员其实都几无辜，因为剧本台词并唔系佢哋可以决定，而且，成部网剧，衰嘅并唔单单系配音，而系整体。
虽然睇得一集，但系成部戏畀我嘅感觉，已经冇熟悉嘅港味，更加唔好话同真正嘅《无间道》相提并论。
罗嘉良同刘松仁喺戏入边嘅一段对话，或者可以畀我哋答案。
虽然系喺香港取景，香港拍摄，用嘅系香港演员，讲嘅都系香港警匪故事，但系呢部剧嘅定位同目标，始终系大陆市场。
喺呢个前提之下，粤语要为普通话让路，就算一啲原汁原味都冇，都要坚持用国语，为13亿市场服务。
坦白讲，见到咁嘅合拍剧，我只觉得悲哀。
所以，我哋仲应唔应该期待跟住嘅《使徒行者2》？
各位自己友，对于呢部《无间道》，
同埋未来嘅《使徒行者2》
你哋又有咩想讲？
部分图片素材出自知乎、百度百科
本文看点羊城网原创
利事豐：粵語文化，代代相傳……
利事豐丁酉年全新設計，包含六大押韻盞鬼恭賀粵語主題，細細封好好袋！手機掃描背面二維碼，即刻挑戰【估畫粵語】，今年拜年同兄弟姐一齊鬥智啦！
零售價：￥35文/盒
淘寶購買請搜索店鋪【羊記雜貨鋪】
團購或定制請聯繫：020-83195715-805
最新评论