仲有两个星期就系农历新年，你哋嘅老妈子系咪又开始谂紧年夜饭菜式，广州传统年夜饭菜式一共有八味。

鸿运大拼盘（卤猪脷、卤牛肚、卤鹅肾、卤鹅翼）——寓意一本万利，容四方之财。

 

红红火火（脆皮烧鹅、当红炸子鸡）——寓意来年红红火火。

 

横财就手（发菜蚝豉猪手）——寓意发财好事，横财就手。

 

哈哈大笑（白焯生虾蟹）——寓意全年哈哈大笑，一年顺利。

 

丁财两旺（腰果松子肉丁芹菜粒）——寓意万子千孙，添丁发财。

 

金银满屋（生菜蚝油冬菇）——寓意生生猛猛，金银满屋。

 

年年有余（清蒸鱼）——鱼要食剩小小，寓意年年有余。

 

白切鸡——无鸡不成宴。

不过年年咁食，点都会厌，所以我今日就要推荐一个节目，解决你年夜饭菜单。呢个就系TVB啱播完嘅《阿爷厨房》。

自从台庆完咗之后，TVB嘅戏收视都惨淡得惊人，而唯有呢部李家鼎同谭玉瑛主持嘅《阿爷厨房》收视一路长红，杀出重围，仲获得网友嘅一致好评。

《阿爷厨房》（以下简称《阿爷》）其中嘅“阿爷”肯定系指鼎爷李家鼎，我哋对鼎爷嘅印象，基本上都停留系佢饰演嘅反派或武林高手。

或者仲有人会知道佢系TVB嘅武术指导同埋马术导师及统筹。

不过十个入边有九个都唔知道，鼎爷虽然睇起身恶型恶相，但系厨艺了得，深藏不漏。

鼎爷出生于广州，佢父亲系一个大酒楼嘅东主，所以佢自细就接受粤菜厨艺训练，练就一身好厨艺，后来家道中落，就过咗香港搵食，之后先开始做武指同演员。

平时演大奸大恶角色嘅鼎爷颠覆形象嚟教煮嘢，硬汉外表外既有扎实嘅厨艺功架，又有家庭煮男嘅细腻心思，畀人一种反差萌，即刻令人路转粉。

节目煮菜之前经常去市场买餸，鼎爷会讲解每种食材嘅特质，点解会选择呢种食材，同埋挑选秘诀。

然后切嘢嗰时候，睇得出鼎爷刀功纯熟，功架十足，一啲都唔花巧，真系成个酒楼大师傅咁。

▲大家有冇留意到，鼎爷拍姜嘅时候会用力拖一拖，令到姜更加烂

煮餸嘅时候，咩时候落咩，点样可以呢味菜更出色，都会讲到。

鼎爷唔止有料到，最可爱嘅仲系佢嘅真性情，虽然鼎爷讲野有啲懒叻，但系唔会令人讨厌，而且佢仲时不时扮鬼扮马。

鼎爷得闲仲会讲下旧时嘅嘢，吐槽下封建制度，讲下自己唔中意老窦咁压迫阿妈，令人感觉真系好似爷爷耐心教自己煮嘢。

其实《阿爷》从厨房用具、食材选购，到菜单设计等等，都系由鼎爷一个人负责。

节目之中所用嘅厨具，都系佢自己嘅私伙嘢，炒菜嘅铁镬系有用过嘅痕迹，唔同于一般饮食节目所用嘅靓靓平底镬。

鼎爷呢个大师傅系《阿爷》嘅灵魂，而令呢个节目咁成功嘅，仲因为呢个节目够接地气。

我哋睇《十二道锋味》之类嘅美食节目，会觉得好高大上，但系始终入边嘅菜式原料、煮法都唔适合一般家庭。

而《阿爷》入边烹调嘅菜式，都系啲家常菜同埋古法粤菜，包括「BB鸽藏膶肠焗饭」、「荷芹炒腊味」、「糖煎红衫鱼」、「茄汁煎大虾」、「古法枝竹羊腩煲」等等。

所有嘅食材，都可以喺市场或者超市买到，而且都唔会好贵，完全系平靓正嘅家常小菜。

菜式实际之余，煮法都系偏实用性，每个步骤都系演示，解释畀你听点解要咁做。

更加重要嘅系，呢个节目传授咗好多接近失传嘅正宗粤菜，入边嘅一啲菜式，可能你连听都冇听过。

比如有一集讲到嘅「两面黄煲仔饭」，就系煮煲仔饭嘅时候，将煲翻转烧，令到饭底饭面都有饭焦。

呢种煲仔饭上世纪二三十年代就存在，不过依家已经冇几多人知。

仲有「移花接木」嘅蒸鱼方式，将黄脚鱲鱼肉放喺黑鱲上面一齐蒸，令黄鳍鲷嘅油分同香味融入肉质冇咁滑嘅黑鱲之中，取长补短，两种鱼嘅优点得以融为一体，呢个几乎系失传嘅菜式。

▲蒸好之后，细块黄脚鱲已经过火，所以以前嘅人通常唔食黄脚鱲，只食下边嘅黑鱲，不过鼎爷建议都食晒，唔好浪费。

而上面嘅菜都唔系好复杂，好多人喺屋企都可以煮到呢啲怀旧嘅粤菜，用嚟做年夜饭菜式更加系一流啦。

讲到食，大家都会话自己食得好厌尖，但系系米个个都真系识食，知道咩叫正宗粤菜味道。

依家嘅人食粤菜，务求快，务求方便，以为味道浓郁刺激就系好食，真正粤菜传统菜，都好少人去研究。

“食在广州”，好似只剩返“食材”在广州嘅含义，正宗传统嘅“食法”就系咁慢慢消失。

冇几多人仲可以好似鼎爷咁，简简单单煎条鱼都落足功夫，一直攞住个镬不停转，令到成条鱼都受热均匀，再慢慢用细火煎到金黄。

其实，饮食节目唔一定要下下教新菜，教观众煮好传统菜、家常菜，琢磨好每个步骤，咪一样可以煮得出彩，煮得好睇，期待《阿爷厨房》可以有续集。

P.S 《阿爷厨房》B站有资源，一共20集，想睇趁早！

各位自己友，

你哋屋企年夜饭又会有咩必备菜式？

喺留言区讲嚟听下！

本文看点由羊城网原创

特此声明