有一个话题，一直被讨论：「粤语乐坛走向没落」。

近年来，除咗香港音乐市场不景气、音乐氛围渐渐低落之外，越来越多香港歌、影明星“北上”发展，为咗迎合大部分中国人嘅喜好，呢啲明星操住“唔咸唔淡”嘅普通话，唱歌、拍剧、拍电影…

对于部分北上歌星，从在行嘅粤语歌，转唱半桶水嘅国语歌，无论唱功同感情都比原本差咗一个档次。唱得差，自然冇人听，但为咗发展，唯有放低音乐，攞起剧本。

亦都喺呢一个背景之下，「粤语乐坛走向没落」，呢个话题畀人讨论得十分火热。不过，只要听到呢首歌嘅前奏，人人都会唱返几句！

呢首《海阔天空》你听咗几多年？听到前奏，你会唔会开口唱“今天我”？你手机里面有冇《海阔天空》？去唱K会唔会点呢首歌？

答案系咩大家都好清楚。虽然一首歌说明唔到乜嘢，但系Beyond嘅金曲，点止一首？

母亲节唱《世上只有妈妈好》会好肉麻好骨痹，我哋仲会唱《真的爱你》，显得更加真挚。

喺KTV同朋友合唱《我的好兄弟》，总系觉得莫名嘅核突，但系一齐合唱《谁伴我闯荡》，大家都会有感触。

回忆初恋，有人喊虎喊忽，有人难以开口，都有人唱一首《情人》释怀。

Beyond仲有好多金曲，20年来一直畀人翻唱翻唱再翻唱，从香港唱到内地，从中国唱到外国，由中国人唱，到外国人都跟住唱。呢种魅力，除咗王家驹、Beyond之外，同样都有一份粤语歌嘅魅力！

好多人都话，每一个人心里面都有一首“陈奕迅”，同样，每个人心里面都有一首“Beyond”，只要一日有人听Beyond，粤语乐坛仲点会没落？