前两日，阿爆控诉过TVB剧集有几无厘头，今日到我为大家带来下半场，TVB除咗系无厘头始祖，仲系连环“车祸”现场！

讲嘅咪就系从演员、角色、情节都可以通通“撞车”！听唔明唔紧要，睇落去你就明！

追TVB嘅人都知道呢个经典案例，就系演员罗乐林「一日之内死五次」，好经典到连外国媒体都报道咗呢件事！

2011年4月6日起，罗乐林饰演嘅角色就接连喺多部电视剧中“卖咸鸭蛋”！

从4月6号晚20:30嘅《洪武三十二》，同晚播出嘅《女拳》同《七号差馆》，到7号重播嘅《布衣神相》、《皆大欢喜》，罗乐林分别死咗五次，仲要五种死法唔重复！

「一日之内死五次」，呢啲咁不可思议嘅事，真系只此一家，别无分号。据说当年新闻好多人关注，令到TVB高层考虑过将此次事件申请入健力士世界纪录大全。

比罗乐林「一日之内死五次」更惨嘅，系一晚之内连续强女干两个女性！

TVB有个演员叫黄炜溏，睇相你肯定知道系边个。

由于相貌比较凶神恶煞，所以佢经常饰演奸角、罪犯、黑社会等反面角色，佢都经常要出演污辱女性嘅戏份。

就喺2014年10月，TVB播紧《大药坊》同《再战明天》，两部戏同一晚竟然都有强暴戏份，而强暴角色都系黄炜溏！

8点半《大药坊》，高海宁饰演嘅酒馆老板娘，惨遭黄炜溏强暴，然后9点半嘅《再战明天》，石天欣喺戏中被饰演继父嘅黄炜溏强暴。

▲其实黄炜溏之前喺《巨轮》都强暴过石天欣，今铺真系原班人马激情出演！

同一晚连续两出戏有强暴情节已经够离奇，估唔到“强暴犯”仲要系同一个人，搞到黄炜溏得到「万年强奸犯」嘅称号。

唔知大家仲记唔记得前两年嘅一部“神剧”——《神鎗狙击》，内容浮夸，剧情众多BUG，演员尴尬，特效又极其水。

▲当年徐子珊呢幕爆炸飞身图，畀人P咗好多个版本

咁都唔系最经典，9月23号播出嘅时候，《神鎗狙击》竟然一个钟头内有三场绑架戏！

周海媚同杨爱瑾两姐妹，轮流被人标参，搞到我都想叫啲绑匪直接撕票啦，咪鬼浪费我时间！

仲有一件事，当晚播出嘅《巨轮》，同样有绑架戏，绑架对象系钟嘉欣同萧正楠。

最桥嘅系，两套戏嘅绑匪一样都系四个人，绑架赎款都系五千万（不过一个系美金一个系港币），令人怀疑两出戏系咪同一个时空，同一班绑匪客串！

讲完情节撞车，就要讲下角色撞车，TVB嘅经典情侣档都系撞车重灾区，我以前盘点过。

其实近几年嚟，TVB配角撞车非常常见，同一晚播出嘅两套剧集，配角来来去去都系嗰啲人，越睇越连戏！

《回到三国》同《护花危情》嘅演员堪称连环撞车现场，好似一班三国人投胎到现代咁，当时追剧追到我蒙查查！

《回到三国》嘅刘关张三兄弟，去到《叛逃》竟然都系饰演组织成员，一齐杀死罗乐林（《三国》中饰演曹操），被戏称为「刘关张转世杀曹操」。

情侣档唔可怕，最可怕嘅系唔同剧集就反目嘅情侣档！

马国明同陈法拉，喺唐朝嘅《公主嫁到》中饰演夫妻，但到咗民初嘅《女拳》，陈法拉拒绝马国明嘅追求，最后两人反目。

又比如，《女拳》中黄宗泽同陈法拉系夫妻，但到咗《潜行狙击》，跛co害死咗Madam Jo！！！

▲观众：你做咩怼你老婆啊！

马国明同杨怡嘅身份都好扑朔迷离，《回到三国》同《On Call 36小时》中，佢哋系情侣。

但到咗《铁马寻桥》同《名媛望族》中，佢哋就变成“母子”关系。

一件头叫鱼仔做阿妈，我点睇都觉得怪咯！

时间关系，仲有好多TVB撞车事故冇办法讲到，比如一年中三次风嘅潘志文，演完清朝顺治帝再演道光帝、自己演自己后代嘅陈锦鸿等。

由于演员不足，编剧能力低，TVB嘅“撞车”越嚟越频繁，令观众感觉到疲倦！

作为TVB嘅忠实fans，我都系希望TVB以后“争气啲”，认真制作剧集，内部唔好成日挂住斗生斗死！

各位自己友，

你哋最深印象嘅“车祸”又系咩？

你睇边部剧试过连戏好严重？

素材出自香港网路大典等

羊城网负责整理编辑