唔知从几时开始，娱乐圈变得暴戾，特别系最近几年，经常有各种以“撕逼”“互怼”“怒呛”为标题嘅新闻出现。
虽然近几年香港娱乐圈相对沉寂，但曾几何时香港娱乐圈明星之间嘅明争暗斗都非常激烈，精彩到日日封面都系爆点。
今日就回顾一部TVB自黑+讽刺娱乐圈嘅经典佳作——
《娱乐插班生》
《娱乐插班生》制作于1995年，此时恰逢香港娱乐圈处于最后一个黄金阶段，尽管态势开始走下坡，但仍然诞生咗好多天王巨星。
所以，香港好多年轻人都会争崩头想入娱乐圈，一炮而红，走上人生巅峰。
主角一家亦唔厉害，全家上下嘅工作多少同娱乐圈有关，几个后生都渴望入娱乐圈。
除咗我哋嘅男主角——陆千石（廖伟雄 饰）
然而世事就系咁奇妙，想入娱乐圈嘅几个主角使尽心机都一直不温不火。
而一心想平凡过日子嘅男主角反而误打误撞出演咗一部部热卖电影，慢慢打响知名度。
现实与讽刺结合嘅剧情之中，最精彩嘅莫过于一众演员惟妙惟肖模仿天皇巨星。
男主细妹陆其濂（梅小惠 饰）系王菲嘅忠实Fans，日日模仿偶像王菲嘅打扮同唱歌。
除咗高度还原王菲嘅经典发型，梅小惠都用佢独特嘅搞笑天分模仿咗好多王菲唱歌嘅腔调同小动作！
男二系当时仲未出名嘅林家栋，饰演嘅蔡君夏同样拥有明星梦，歌喉都唔错，但系怀才不遇而始终红唔起身。
呢个角色嘅原型就系歌神张学友，编剧惊大家估唔到，特登喺角色身后贴上张学友嘅海报，以作暗示。
呢部剧入边，张学友都展现咗佢搞怪扮嘢嘅天赋，模仿起张学友嘅神态动作入型入格，凭借此剧林家栋受TVB重用，开始出演主角，其后拍咗《大闹广昌隆》等经典剧集。
配角都有亮点，比如麦包饰演嘅刘定康，角色原型系王家卫，所以成日戴住王家卫嘅标志性墨镜！
仲时不时恶搞王家卫式嘅经典台词，真系好搞笑。
▲室内都戴住墨镜，我写个服字畀你！
就连出场几秒钟嘅茄喱啡个名，都暗藏玄机！
除咗有扮鬼扮马模仿明星，入边仲有唔少恶搞经典剧集嘅情节。
下边呢个情景，你又估唔估得到喺边部电影？
冇错，就系哥哥同梅姐嘅《胭脂扣》！
不过下一秒，画面即刻就崩坏！（当堂吓咗我一跳……）
Laser姐（韩马利 饰）喺剧入边拍扑蝶戏，就系实力还原经典电影《京华春梦》，连造型都一模一样！
原版喺度↓
仲有《92黑玫瑰对黑玫瑰》嘅电影男女对唱重现！
原版喺度↓
戏入边融入咗好多真实嘅娱乐圈事件，唔单增加咗笑点，亦令入边嘅情节更加具有讽刺性。
三哥同娜姑用假离婚嚟博话题博版面，讽刺四哥（谢贤）同拉姑（狄波拉）嘅离婚风波。
▲剧组都好用心还原四哥嘅经典造型
黎耀祥喺入边饰演嘅角色叫何国宝，系富翁之子，佢屋企通过捐款嚟换取喺电视节目唱歌嘅机会，就系影射紧邓兆尊一家，通过巨额捐款嚟喺《欢乐满东华》唱歌，以此搏风头。
何国宝老窦，角色原型就系大名鼎鼎嘅新马师曾！
佢哋屋企有钱到唔见部车，直接打电话畀江湖大佬，第二日部车就完璧归还啦！
呢个都系真实事件嚟噶！
Laser姐登台演出必唱《热咖啡》，就系讽刺Lisa姐汪明荃永远只有一首登台名曲《热咖啡》。
而编剧仲借演员之口，闹足半个香港娱乐圈，直指好多明星名人！
电视台决定再搵春官（影射郑少秋）演男主角，即刻被人话年纪大又过时，仲做男主角出风头！
刘定康（原型为王家卫）睇唔起彭定坚（原型为王晶）拍嘅电影，直接话系下流导演拍啲屎尿屁电影！
梅艳芳同张国荣搞过封咪，但系之后再出嚟唱歌，直接被形容为“姣婆守唔到寡”！
最搞笑系，有一幕系扮演展昭的演员向记者痛诉TVB剥削压榨员工，果然TVB自黑起身，边个都挡唔住！
好耐冇试过睇一部戏，睇得咁过瘾，可以用一部戏怼足半个香港娱乐圈，
编剧，我服晒你！
艺术源于生活，怀着对娱乐圈嘅憧憬同被功利主义熏陶，其实我哋细个，多少都有发过明星梦，渴望自己被星探发现，然后成为天王巨星，身边都系自己曾经嘅偶像。
但系呢部戏用咗一种恶搞幽默嘅方式，向我哋解像娱乐圈嘅另一面，表面越美好，背后越残酷。
镜头前和和气气，称兄道弟，转个头就互相埋怨。
新人为一个广告抢崩头，结果发现其实呢个广告就系露个背，成名嘅路上都系荆棘，而绝大部分人死喺荆棘，突围而出嘅永远只系凤毛麟角。
而更讽刺嘅系，喺娱乐圈走红，有时唔系靠实力，而系靠话题靠炒作，有话题，观众自然会八卦会关心，跟住个个都围住你转！
连比赛都会对你网开一面，因为冇一个制作公司想错过一个话题制造者。
当你冇话题冇爆点，观众自然唔愿意睇你，即刻人走茶凉，受人白眼！
呢啲曾经系香港娱乐圈嘅写照，同样系大陆娱乐圈嘅现状。
八卦娱乐事业嘅历久不衰，观众永远中意睇他人人生嘅高潮低洼、嬉笑怒骂。
但系，作为观众嘅我哋，一直催生热点、追随热点、遗忘热点，再去催生另一堆热点产生，周而复始，咁最后我哋又得到啲咩？
《插班生》其实系一个系列嘅电视剧，仲有《豪门插班生》同《乐坛插班生》，有兴趣嘅自己友不妨去睇下啦！
唔讲咁多，我去继续追另外两部啦！祝大家周末快乐！
P.S 《插班生》系列喺优酷都有资源
各位自己友，
你当年都追过边部《插班生》？
图片素材来源于网络
本文看点由羊城网原创
最新评论